మొహంజొదారో కలెక్షన్స్ ఏమి చెబుతున్నాయి?

జోధాఅక్బర్‌ లాంటి సినిమా ఎవరు మరిచిపోగలరు? ఆ సినిమాలో హృతిక్ రోషన్ నటన - అశుతోష గోవారికర్ డైరెక్షన్ ప్రతిభ కలిసి అది ఒక బ్లాక్ బస్టర్ గా మిగిలింది. ఇక అదే కాంబినేషన్ లో రాబోయే సినిమా అంటే జనాల్లో మామూలు క్రేజ్ ఉండదు. ఆ సినిమా ఎప్పుడొస్తుందా.. ఏ స్థాయిలో ఉంటుందా.. అనే ఆలోచనలో అభిమానులు - ప్రేక్షకులూ ఎదురుచూస్తుంటారు. దీంతో.. వీరిద్ధరి కాంబినేషన్ లో వచ్చే మొహింజదారో సినిమా కు ఓపెనింగ్ కలెక్షన్స్ మామూలుగా ఉండవు - రికార్డులు సృష్టిస్తాయని ఇండస్ట్రీ జనాలు కూడా భావించారు. ఇలా అంతా అనుకుంటున్నారో లేదో అలా ప్రేక్షకుల ముందుకు వచ్చేసింది మొహంజొదారో మూవీ.

ఇంతలో ఏమైందో తెలియదు కానీ.. ముందుగా ఊహించుకున్నదానికి పూర్తి వ్యతిరేకంగా జరిగింది. ఆ వ్యతిరేకత ఏ స్థాయిలో అంటే.. అసలు హృతిక్‌ సినిమా వస్తున్న సమయంలో అక్షయ్‌ కుమార్‌ రుస్తుం సినిమా ఉంటుందా అనేటంతగా. తీరా వాస్తవానికొచ్చేసరికి.. రుస్తుం దెబ్బకే మొహంజొదారో కోలుకోలేని పరిస్థితికి వెళ్లిపోయిందని సమాచారం. హృతిక్ సినిమా అంటే తొలిరోజు భారీ స్థాయిలో కలెక్షన్స్ ఉంటాయి. అది హిట్టు సినిమా అయినా.. ఫట్టు సినిమా అయినా తొలిరోజు కలెక్షన్స్ కు వచ్చిన ఇబ్బందేమీ ఉండదు. కానీ.. మొహంజొదారో మాత్రం తొలిరోజు కేవలం 8.86 కోట్లు మాత్రమే వసూలు చేసింది.

తెలుగు సినిమాలే విడుదలయిన రోజు సుమారు 20 కోట్లవరకూ వసూళ్లు సాధిస్తుంటే.. హృతిక్‌ రోషన్ లాంటి స్టార్ హీరో సినిమా కేవలం 8 - 9 కోట్ల మధ్య కొట్టిమిట్టాడటం దారుణమనే చెపాలి. ఈ ఓపెనింగ్స్ - కలెక్షన్స్ ని చూస్తుంటే.. మొహంజొదారో ఏ స్థాయి డిజాస్టరో అర్థమైపోతుందనే చెప్పాలి. ఈ సినిమాకు దర్శకత్వం వహించిన అశుతోషే నిర్మాతగా కూడా మారి దీనిపై 150 కోట్ల బడ్జెట్‌ పెట్టాడు. అయితే తాజా పరిస్థితి చూస్తుంటే మాత్రం ఈ సినిమా తిప్పి తిప్పి కొట్టినా 70 కోట్లు కూడా వసూలు చేయదని ట్రేడ్ వర్గాలు చెప్పుకొస్తున్నాయి. ఈ స్థాయిలో కలెక్షన్స్ పడిపోవడం.. అటు హృతిక్ కి ఇటు అశుతోష్ కి కూడా ఫుల్ డిసప్పాయింట్ మెంట్ అనే చెప్పాలి!