ఇంతకీ శాతకర్ణిలో అతనున్నాడా లేదా?

‘కంచె’ సినిమా మాదిరే.. ‘గౌతమీపుత్ర శాతకర్ణి’ని పక్కా ప్లానింగ్‌‌తో శరవేగంగా పూర్తి చేసేస్తున్నాడు క్రిష్. ఇప్పటికే రెండు షెడ్యూళ్లు పూర్తయిపోయాయి. మూడో షెడ్యూల్ కూడా మొదలైపోతోంది. ఈ షెడ్యూల్‌తో యాక్షన్ సన్నివేశాలన్నీ పూర్తయిపోతాయని అంటున్నారు. ఆ తర్వాత మిగతా సన్నివేశాల చిత్రీకరణ జరుగుతుంది. ప్రస్తుతానికైతే ‘గౌతమీపుత్ర శాతకర్ణి’లో బాలయ్య కాకుండా హేమమాలిని, కబీర్ బేడీ, శ్రియ నటిస్తున్నట్లు మాత్రమే తెలిసింది. అంతకుమించి కాస్టింగ్ గురించి సమాచారం లేదు. వార్ సీక్వెన్స్ అయ్యాక మామూలు సీన్స్ తీసేటపుడు నటీనటుల గురించి క్లారిటీ రావొచ్చు. ఐతే మిగతా ఆర్టిస్టుల సంగతేమో కానీ.. ఇందులో అసలు బాలయ్య కొడుకు మోక్షజ్న నటిస్తున్నాడా లేదా అన్నది అభిమానుల్ని ఉత్కంఠకు గురి చేస్తున్న ప్రశ్న.

తన వందో సినిమాలో మోక్షజ్న నటిస్తాడని బాలయ్య అప్పట్లో చెప్పాడు. ఐతే ఆ మాట అనేసరికి బాలయ్య ‘గౌతమీపుత్ర శాతకర్ణి’ కమిట్ కాలేదు. ఈ సినిమా తెరమీదికి వచ్చాక బాలయ్య తన కొడుకు గురించి ఎక్కడా ప్రస్తావించలేదు. కానీ అతడు ఓ పాత్ర చేస్తున్నట్లు ఆ మధ్య వార్తలొచ్చాయి. తర్వాత చప్పుడు లేదు. మరి ఇంతకీ బాలయ్య వందో సినిమాలో మోక్షజ్న ఉంటాడా..? లేక నేరుగా వచ్చే ఏడాది పూర్తి స్థాయి హీరోగా అరంగేట్రం చేస్తాడా అన్నది తేలాల్సి ఉంది. మోక్షజ్న ఎంట్రీ కోసం రాజమౌళి - బోయపాటి - త్రివిక్రమ్ - కొరటాల శివ.. నలుగురిలో ఒకరిని దర్శకుడిగా ఎంపిక చేయాలని బాలయ్య భావిస్తున్నట్లు సమాచారం.