ట్రైలర్ టాక్: దేవుడు లేనిచోట మామ్

'దేవుడు ప్రతీ చోటనా ఉండడు'.. 'అందుకే నినను అమ్మను చేశాడు' .. ఈ రెండు డైలాగులతో శ్రీదేవి మెయిన్ లీడ్ లో వస్తున్న ''మామ్'' సినిమా ఏంటనేది అర్ధం చేసుకోవచ్చు. గతంలో ఈ సినిమా టీజర్ ను ఆల్రెడీ చూశాం. ఇప్పుడు ఈ సినిమా ట్రైలర్ వచ్చేసింది.

దేవకి (శ్రీదేవి) తన మొగుడు దగ్గర ఏదో దాస్తూ.. ఇంకా దేని కోసమో వెతుకుతూ ఉంటుంది. 'తప్పుకీ.. పెద్ద తప్పుకీ మధ్యన మీరు ఏం ఎంచుకుంటారు?' అనే థీమ్ లైన్ తో ఈ సినిమా మొత్తాన్ని రూపొందించాడు దర్శకుడు రవి ఉడయార్. సినిమాలో పెద్ద ట్విస్టు ఏంటంటే.. తన మొగుడికి అసలు కూతురు కానమ్మాయిని కూతురు అంటూ పరిచయం చేస్తుంది 'మామ్'. అసలు ఆమె ఎవరి కోసం ఎదురు చూస్తోంది.. ఎందుకు అబద్దం చెబుతోంది.. అనేదే అతి పెద్ద ప్రశ్న. మొత్తానికి ఇప్పుడు ఒక థ్రిల్లర్ తో తన లక్ చేసుకుంటోంది ఈ సీనియర్ బ్యూటి.

అసలు ట్రైలర్ మొత్తంలో హైలైట్ ఏంటంటే.. అందం అంటే పడిచచ్చిపోయే శ్రీదేవి.. చివరకు గ్లామరసం లుక్కులను పక్కనెట్టేసి.. తన ఏజ్ కు తగిన పాత్రను చేస్తోంది. ఆ విధంగా మనం ఈ సినిమాను కాస్త కొత్తగా ఉందని అనుకోవచ్చేమోలే. ఇకపోతే ఈ సినిమా కథలో రవి ఉడయార్.. గిరీష్‌ కొహ్లీలతో పాటు.. కోన వెంకట్ కూడా ఒక చెయ్యేశాడు.