స్పీడ్ పెంచిన 'మోస్ట్ ఎలిజిబుల్ బ్యాచిలర్'.. ట్రైలర్ ఎప్పుడంటే..?

యూత్ కింగ్ అఖిల్ అక్కినేని - పూజాహెగ్డే హీరోహీరోయిన్లుగా 'బొమ్మరిల్లు' భాస్కర్ దర్శకత్వంలో తెరకెక్కుతున్న తాజా చిత్రం ''మోస్ట్ ఎలిజిబుల్ బ్యాచిలర్''. ఇందులో అఖిల్ సరసన పుజా హెగ్డే హీరోయిన్ గా నటించింది. యూత్ ఫుల్ లవ్ అండ్ రొమాంటిక్ ఫ్యామిలీ ఎంటర్టైనర్ గా ఈ సినిమా రూపొందుతోంది. దసరా కానుకగా అక్టోబర్ 15న ఈ చిత్రాన్ని ప్రపంచ వ్యాప్తంగా థియేట్రికల్ రిలీజ్ చేయనున్నారు. ఈ నేపథ్యంలో శరవేగంగా ప్రమోషనల్ కార్యక్రమాలు నిర్వహిస్తున్న మేకర్స్.. ట్రైలర్ ను విడుదల చేయడానికి రెడీ అయ్యారు.

''మోస్ట్ ఎలిజిబుల్ బ్యాచిలర్'' థియేట్రికల్ ట్రైలర్ ను సెప్టెంబర్ 30న సాయంత్రం గం. 6.10 నిమిషాలకు విడుదల చేయనున్నట్లు చిత్ర యూనిట్ తెలిపింది. ఈ సందర్భంగా ఓ సరికొత్త పోస్టర్ ని ఆవిష్కరించారు. ఇందులో నడిరోడ్డు మీద అఖిల్ నిలబడి ఉండగా.. పూజా భయంతో అఖిల్ ను గట్టిగా హగ్ చేసుకొని ఉంది. ఇప్పటి వరకు ఈ చిత్రం నుంచి విడుదలైన పోస్టర్స్ - టీజర్ - సాంగ్స్ కు అద్భుతమైన స్పందన వచ్చింది. 'మనసా మనసా' 'గుచ్చే గులాబీ' 'ఏ జిందగీ' 'లెహరాయి' పాటలు శ్రోతలను విశేషంగా ఆకట్టుకొని చార్ట్ బస్టర్స్ గా నిలిచాయి.

ఈ క్రమంలో సెప్టెంబర్ 30న రాబోతున్న ''మోస్ట్ ఎలిజిబుల్ బ్యాచిలర్'' ట్రైలర్ ఎలా ఉండబోతుందో అని అక్కినేని అభిమానులు ఆతృతగా ఎదురుచూస్తున్నారు. ఈ సినిమాతో అఖిల్ మంచి సక్సెస్ అందుకుంటారని ధీమాగా ఉన్నారు. ఈ చిత్రంలో ఆమని - ఈషా రెబ్బా - చిన్మయి - వెన్నెల కిషోర్ - మురళీశర్మ - జయప్రకాష్ - ప్రగతి - అమిత్ తివారి - సుడిగాలి సుధీర్ - గెటప్ శ్రీను - అభయ్ తదితరులు ఇతర పాత్రలు పోషించారు.

అల్లు అరవింద్ సమర్పణలో జీఏ2 పిక్చర్స్ బ్యానర్ పై బన్నీ వాస్ - వాసు వర్మ సంయుక్తంగా 'మోస్ట్ ఎలిజిబుల్ బ్యాచిలర్' చిత్రాన్ని నిర్మిస్తున్నారు. గోపీసుందర్ ఈ చిత్రానికి మ్యూజిక్ డైరెక్టర్. ప్రదీశ్ వర్మ సినిమాటోగ్రఫీ అందించగా.. అవినాష్ కొల్లా ఆర్ట్ డైరెక్టర్ గా వర్క్ చేశారు. మార్తాండ్ కె. వెంకటేష్ ఎడిటింగ్ బాధ్యతలు స్వీకరించారు.