ట్రైలర్: మందని వదిలి కొత్తదారిలో వెళ్దామంటున్న 'మోస్ట్ ఎలిజిబుల్ బ్యాచిలర్'

యూత్ కింగ్ అక్కినేని అఖిల్ - పూజా హెగ్డే హీరోహీరోయిన్లుగా నటించిన యూత్ ఫుల్ లవ్ అండ్ రొమాంటిక్ ఫ్యామిలీ ఎంటర్టైనర్ ''మోస్ట్ ఎలిజిబుల్ బ్యాచిలర్''. 'బొమ్మరిల్లు' 'పరుగు' వంటి సూపర్ హిట్ చిత్రాలతో తనకంటూ ప్రత్యేకమైన గుర్తింపు తెచ్చుకున్న దర్శకుడు భాస్కర్ ఈ చిత్రాన్ని తెరకెక్కిస్తున్నారు. ఎన్నాళ్ళుగానో ఊరిస్తూ వస్తున్న ఈ చిత్రాన్ని దసరా కానుకగా అక్టోబర్ 15న ప్రేక్షకుల ముందుకు తీసుకొస్తున్నారు. ఈ నేపథ్యంలో శరవేగంగా ప్రమోషన్స్ చేస్తున్న మేకర్స్.. తాజాగా థియేట్రికల్ ట్రైలర్ ను విడుదల చేసారు.

'మన లైఫ్ పార్టనర్ తో కనీసం 9000 నైట్స్ కలిసి పడుకోవాలి.. వందల వెకేషన్స్ కు వెళ్ళాలి.. కొన్ని లక్షల కబుర్లు చెప్పుకోవాలి' అని పూజా కాబోయేవాడు ఎలా ఉండాలో చెప్పడంతో ఈ ట్రైలర్ స్టార్ట్ అయింది. 'ఒక అబ్బాయి లైఫ్ లో 50 శాతం కెరీర్.. 50 శాతం మ్యారీడ్ లైఫ్.. మ్యారీడ్ లైఫ్ బాగుండాలి అంటే కెరీర్ బాగుండాలి..' అనే అభిప్రాయంతో ఉండే ఎలిజిబుల్ గా అఖిల్ ను పరిచయం చేశారు. మోస్ట్ ఎలిజిబుల్ బ్యాచిలర్ అని పేరు తెచ్చుకున్నాకే పెళ్లికి రెడీ అయిన.. తనకు ఎలాంటి లైఫ్ పార్టనర్ కావాలనే క్లారిటీ ఉందనుకునే అబ్బాయిగా అఖిల్ కనిపిస్తున్నాడు.

ఈ క్రమంలో మన హీరో కొన్ని పెళ్లి చూపులకు వెళ్లడం.. అమ్మాయిలను చిలిపి ప్రశ్నలు అడగడం నవ్వు తెప్పిస్తోంది. అయితే పెళ్లి చూపుల్లో అఖిల్ అడిగిన వైల్డ్ గా థింక్ చేయమన్న దానికి అభ్యంతరం చెబుతూ ఫారియా అబ్దుల్లా ('జాతిరత్నాలు' హీరోయిన్) అఖిల్ పై కోర్టుకు వెళ్లినట్లు చూపించారు. 'నీకు పెళ్లి గురించి ఏం తెలియదు.. చేసుకోబోయే అమ్మాయిలో ఏం కావాలో తెలియదు.. నీ గురించి కూడా నీకు ఏమీ తెలియదు' అంటూ అఖిల్ ను పూజా రియలైజ్ చేసే ప్రయత్నం చేస్తోంది.

'విడిపోయిన వారిని చూసినా నాకు భయం ఉండదు కానీ.. కలిసి పక్కపక్కనే బ్రతుకుతున్నారు చూడూ.. వాళ్ళని చూస్తేనే భయమేస్తోంది' అని పూజా చెప్పడం ఆలోచిపజేస్తోంది. 'ఒక హాప్ పట్టుకుని ఒకప్పుడు నేను కూడా చీకటి నుండి వెళుతురికి వచ్చాను..' 'లోకం సర్దుకుపో అంటోంది.. మందని వదిలి.. కొత్తదారి వెతికి.. నేను వెళ్తున్నాను' వంటి డైలాగ్స్ ఆకట్టుకుంటున్నాయి. బొమ్మరిల్లు భాస్కర్ ఏదో కొత్త పాయింట్ ని చెప్పబోతున్నారని తెలుస్తోంది. ట్రైలర్ లో అఖిల్ - పుజా హెగ్డే మధ్య కెమిస్ట్రీ బాగా కుదిరినట్లు తెలుస్తోంది. ఇద్దరి మధ్య ముద్దు సన్నివేశాలు - రొమాంటిక్ సీన్స్ కూడా ఉన్నాయి.

'మోస్ట్ ఎలిజిబుల్ బ్యాచిలర్' చిత్రం నుంచి ఇప్పటికే విడుదలైన టీజర్ - పాటలు విశేష స్పందన తెచ్చుకున్నాయి. ఈ క్రమంలో తాజాగా వచ్చిన థియేట్రికల్ ట్రైలర్ ఆకట్టుకోవడమే కాకుండా సినిమాపై అంచనాలు పెంచేసింది. ఈ చిత్రంలో ఆమని - ఈషా రెబ్బా - చిన్మయి - వెన్నెల కిషోర్ - మురళీశర్మ - జయప్రకాష్ - అజయ్ - ప్రగతి - అమిత్ తివారి - సుడిగాలి సుధీర్ - గెటప్ శ్రీను - అభయ్ తదితరులు ఇతర పాత్రలు పోషించారు.

మెగా ప్రొడ్యూసర్ అల్లు అరవింద్ సమర్పణలో జీఏ2 పిక్చర్స్ బ్యానర్ పై బన్నీ వాస్ - వాసు వర్మ సంయుక్తంగా ఈ చిత్రాన్ని నిర్మిస్తున్నారు. గోపీసుందర్ ఈ చిత్రానికి మ్యూజిక్ కంపోజ్ చేశారు. ప్రదీశ్ వర్మ సినిమాటోగ్రఫీ అందించగా.. అవినాష్ కొల్లా ఆర్ట్ డైరెక్టర్ గా వర్క్ చేశారు. మార్తాండ్ కె. వెంకటేష్ ఎడిటింగ్ బాధ్యతలు స్వీకరించారు. సాలిడ్ సక్సెస్ కోసం ఎదురుచూస్తున్న అఖిల్ - భాస్కర్ లకు 'మోస్ట్ ఎలిజిబుల్ బ్యాచిలర్' మూవీ ఎలాంటి విజయాన్ని అందిస్తుందో చూడాలి.