టాలీవుడ్‌ ను అత్యంతగా నిరాశ పరిచిన..

ఈ ఏడాది అత్యంత నిరుత్సాహపరచిన అంశం.. అక్కినేని వారసుడు - నాగార్జున తనయుడు అఖిల్ నటించిన అఖిల్ మూవీ. ఈ చిత్రాన్ని వివి వినాయక్ లాంటి మాస్ దర్శకుడు తెరకెక్కించడంతో.. అనేక అంచనాలు ఏర్పడ్డాయి. అరంగేట్రంలోనే టాలీవుడ్ లో ఏ స్టార్ వారసుడికీ లేనంత హైప్ అఖిల్ కి దక్కింది.

అఖిల్ ఆడియో ఫంక్షన్ కి టాలీవుడ్ సూపర్ స్టార్ మహేష్ బాబు హాజరయ్యి.. అఖిల్ ని 'ఫ్యూచర్ సూపర్ స్టార్' అనేశాడు. దీంతో అంచనాలు మరింతగా పెరిగిపోయాయి. అయితే.. ప్రారంభంలో అఖిల్ పై ఎక్స్ పెక్టేషన్స్ ఎక్కువగానే ఉన్నా.. దసరా పండుగ రోజున రిలీజ్ కావాల్సిన అఖిల్ మూవీని నాగ్ వాయిదా వేయించడంతో అనుమానాలు తలెత్తాయి. ఈ సమయంలో నిర్మాత నితిన్ - డైరెక్టర్ వినాయక్ కి వ్యతిరేకంగా అక్కినేని అభిమానులు ప్రదర్శనలు కూడా చేశారు.

గ్రాఫిక్ వర్క్ జాగ్రత్తగా చేయించి, పిక్చర్ ని వీలైనంతగా ట్రిమ్ చేయించారు నాగ్. అయినా సరే.. ఈ మూవీ ప్రేక్షకులను ఆకట్టుకోలేక డిజాస్టర్ గా మిగిలింది. హీరో అఖిల్ కి డ్యాన్స్ - ఫైట్స్ విషయంలో మాత్రం మంచి మార్కులు పడడం ఒక్కటే ఈ చిత్రంతో ఊరట. అక్కినేని వంశం నుంచి తొలి మాస్ హీరో వచ్చాడనే ఆనందిస్తున్న ఫ్యాన్స్ కు.. అఖిల్ తన మరుసటి చిత్రంతో అయినా ఊరట కలిగించాల్సిన అవసరం ఉంది.