Mrs.సీరియల్ కిల్లర్: క్రైమ్ థ్రిల్లర్ తో వస్తున్న జాక్వెలిన్

తెలుగులో అంటే ఈ మధ్య వెబ్ సిరీస్ ల హవా మొదలైంది కానీ హిందీలో చాలాకాలం నుండి వెబ్ సిరీస్ లో హంగామా షురూ అయింది. సైఫ్ అలీ ఖాన్ లాంటి బాలీవుడ్ హీరోలు.. కియారా అద్వానీ లాంటి క్రేజీ హీరోయిన్లు కూడా వెబ్ సిరీస్.. వెబ్ ఫిలిమ్స్ లో నటిస్తూ అందరిని ఆకట్టుకున్నారు. తాజాగా జాక్వెలిన్ ఫెర్నాండెజ్.. మనోజ్ బాజ్ పాయ్.. ప్రధాన పాత్రలో నటించిన 'Mrs. సీరియల్ కిల్లర్' వెబ్ ఫిలిం ట్రైలర్ రిలీజ్ అయింది. ఈ ఫిలిం మే 1 వ తారీఖు నుండి నెట్ ఫ్లిక్స్ లో స్ట్రీమింగ్ కానుంది.

టైటిల్ కి తగ్గట్టే ఈ వెబ్ ఫిలింలో మనోజ్ బాజ్ పాయ్ ఒక సీరియల్ కిల్లర్ పాత్ర పోషిస్తున్నాడు. జాక్వెలిన్ తనకు భార్య గా నటిస్తోంది. పలువురు అమ్మాయిలను హత్య చేసిన కేసులో మనోజ్ బాజ్పాయ్ ఇరుక్కుంటాడు అయితే భర్తను ప్రాణంగా ప్రేమించే జాక్వెలిన్ తన భర్త కోసం ఏం చేసింది. ఎంత దూరం వెళ్ళింది అనేది కథ. ట్రైలర్ చూస్తుంటే మంచి క్రైమ్ థ్రిల్లర్ లక్షణాలు ఉన్నాయి. ట్రైలర్ లాస్ట్ సీన్ లో "ఇప్పటివరకు నువ్వు నువ్వు టార్చర్ అనేది చూడలేదు. ఇప్పుడు చూస్తావు"అని జాక్వెలిన్ చెప్పే డైలాగ్ చూస్తే.. ఇంతకీ సీరియల్ కిల్లర్ ఎవరు? మనోజ్ బాజ్ పాయా లేక జాక్వెలినా అనే అనుమానం రాక మానదు.

అడల్ట్ సినిమాల్లో బూతు ఉండకూడదు.. క్రైమ్ థ్రిల్లర్ సినిమాల్లో హింస ఉండకూడదు అనే పాచిపోయిన సిద్ధాంతాలను పక్కన పెట్టి.. ఇలాంటి థ్రిల్లర్లు ఇష్టం ఉన్నవాళ్ళు హాయిగా చూడండి.. ఇష్టం లేని వాళ్ళు తూర్పు తిరిగి దండం పెట్టండి. ప్రముఖ కొరియోగ్రాఫర్ ఫరాఖాన్ భర్త శిరీష్ కుందర్ ఈ ఫిలింకు దర్శకుడు.