రజనీ కాదు ధోనీయే

ఒకరు సూపర్ స్టార్.. మరొకరు సూపర్ కెప్టెన్. ఎవరి రంగంలో వారు ఉద్దండులే. వెండితెరపై సూపర్ స్టార్ రజనీకాంత్ అలా నడుచుకుంటూ వెళ్లినా విజిళ్లు పడతాయి... మైదానంలో ధోనీ సిక్సర్ కొడితే చాలు చప్పట్ల వర్షం కురుస్తుంది. ఇద్దరికీ అభిమానుల సంఖ్య కోట్లలోనే ఉంది. మొన్న కబాలి సినిమా సమయంలో రజనీకాంత్ ఫ్యాన్ ఫాలోయింగ్ మరింత పెరిగిపోయింది. ఇప్పుడు క్రికెటర్ ధోనీ కూడా రజనీ అభిమానుల లిస్టులో చేరినట్లుగా కనిపిస్తుంది. కబాలిలో పాపులర్ అయిన ఒక స్టిల్ లో ధోనీ ఫొటోలు దిగగా అవిప్పుడు సోషల్ మీడియాలో చక్కర్లు కొడుతున్నాయి.

కబాలి సినిమాలో రజినీకాంత్ కూర్చుండే స్టైల్ లో ధోనీ కూడా కూర్చొని ఫొటో దిగడమే కాకుండా ‘‘తలైవార్ పోజ్ ట్రై చేశాను చూడండి’' అంటూ ఆ ఫోటోను అందరితో షేర్ చేసుకున్నాడు. ధోనీకి తమిళనాడులో విపరీతమైన క్రేజ్ ఉంది. ఐపీఎల్ లో 'చెన్నై సూపర్ కింగ్స్' జట్టుకు ప్రాతినిథ్యం వహించిన ధోనీ ఆ జట్టును ఛాంపియన్ గా నిలిపాడు. దీంతో రజనీ - ధోనీల చిత్రాలను కలిపి సోషల్ మీడియాలో అభిమానులు తెగ షేర్ చేస్తున్నారు.

కాగా క్రికెట్ లో ఇండియాను మరింత ఎత్తుకు తీసుకెళ్లిన ధోనీపై ఎం.ఎస్ ధోనీ- ది అన్ టోల్డ్ స్టోరీ సినిమా తమిళంలో కూడా విడుదలవుతోంది. దీనికి సంబంధించిన తమిళ ట్రైలర్ కూడా విడుదలైంది. కాగా, రజినీకాంత్ 'రోబో 2.0' సినిమాతో రాబోతున్నాడు. ఈ నేపథ్యంలో సూపర్ స్టార్ - సూపర్ కెప్టెన్ సినిమాల్లో ఏది ఎలా ఆడుతుందో చూడాలి.