టీజ‌ర్ కి టైమ్, డేట్ ఫిక్స్ చేసిన ఉస్తాద్ రామ్‌

వెర్స‌టైల్ డైరెక్ట‌ర్ పూరి జ‌గ‌న్నాథ్ రూపొందించిన మాస్ మ‌సాలా యాక్ష‌న్ ఎంట‌ర్ టైన‌ర్ `ఇస్మార్ట్ శంకర్‌`. ఈ సినిమా బాక్సాఫీస్ వ‌ద్ద భారీ విజ‌యాన్ని సాధించిన ఉస్తాద్ రామ్ కున్న మాస్ ప‌ల్స్ ని, త‌న మార్కెట్ స్థాయిని తెలియ‌జేసింది. ఈ మూవీ స‌క్సెస్ తో ఒకేసారి పూరి జ‌గ‌న్నాథ్‌, హీరో రామ్ మ‌ళ్లీ ట్రాక్ లోకి వ‌చ్చేశారు. రామ్ త‌న పంథాకు భిన్నంగా చేసిన ఈ మూవీ 50 కోట్ల మార్కుని దాటి ట్రేడ్ వ‌ర్గాల్లో సంచ‌ల‌నం సృష్టించింది. ఆ త‌రువాత చేసిన `రెడ్` పెద్ద‌గా వ‌ర్క‌వుట్ కాక‌పోవ‌డంతో మ‌ళ్లీ మాస్ యాక్ష‌న్ మంత్రాన్నే న‌మ్ముకున్నాడు రామ్‌.

ఆయ‌న న‌టిస్తున్న తాజా చిత్రం `ది వారియ‌ర్‌`. యాక్ష‌న్ చిత్రాల ద‌ర్శ‌కుడు ఎన్. లింగుసామి డైరెక్ట్ చేస్తున్నారు. కృతిశెట్టి, అక్ష‌ర గౌడ హీరోయిన్ లుగా న‌టిస్తున్నఈ మూవీని శ్రీ‌నివాస సిల్వ‌ర్ స్క్రీన్స్ బ్యాన‌ర్ పై నిర్మాత శ్రీ‌నివాస‌ చిట్టూరి నిర్మిస్తున్నారు. ప్ర‌స్తుతం చిత్రీక‌ర‌ణ ద‌శ‌లో వుంది. హీరో రామ్ ప‌వ‌ర్ ఫుల్ పోలీస్ ఆఫీస‌ర్ గా న‌టిస్తున్న ఈ మూవీలో విల‌న్ గా యంగ్ హీరో ఆది పినిశెట్టి న‌టిస్తున్నాడు. ఇప్ప‌టికే విడుద‌లైన ఈ చిత్ర ఫ‌స్ట్ లుక్ పోస్ట‌ర్ సినిమాపై అంచ‌నాల్ని పెంచేసింది.

కృతిశెట్టి ఇందులో విజిల్‌మ‌హాల‌క్ష్మిగా న‌టిస్తోంది. వాలెంటైన్స్ డే సంద‌ర్భంగా విడుద‌ల చేసిన క్యారెక్ట‌ర్ పోస్ట‌ర్, ఇటీవ‌ల త‌మిళ హీరో శింబు పాడ‌గా విడుద‌ల చేసిన `బుల్లెట్ బండి ` లిరిక‌ల్ వీడియో విశేషంగా ఆక‌ట్టుకున్నాయి. సినిమాపై ప్రేక్ష‌కుల‌తో పాటు అభిమానుల్లోనూ ఆస‌క్తిని రేకెత్తించాయి. లింగుసామి మార్కు హై ఓల్టేజ్ యాక్ష‌న్ డ్రామాగా రూపొందుతున్న ఈ మూవీని జూలై 14న విడుద‌ల చేయ‌బోతున్నారు. తెలుగు, త‌మిళ భాష‌ల్లో ఏక కాలంలో ద్వి భాష చిత్రంగా తెర‌కెక్కుతున్న ఈ మూవీ చివ‌రి ద‌శ‌కు చేరుకుంది.

ఈ సంద‌ర్భంగా చిత్ర బృందం టీజ‌ర్ తో ప్ర‌మోష‌న్స్ ప్రారంభించేస్తున్నారు. ఈ మూవీ టీజ‌ర్ ని మే 14న సాయంత్రం 5:31 నిమిషాల‌కు విడుద‌ల చేయ‌బోతున్నార‌ట‌. ఈ విష‌యాన్ని వెల్ల‌డిస్తూ మేక‌ర్స్ తాజాగా కొత్త పోస్ట‌ర్ ని విడుద‌ల చేశారు. వైట్ ష‌ర్ట్ లో బ్లాక్ గాగుల్స్ ధ‌రించి డాపర్ లుక్ లో మీసం మెలేసి రామ్ క‌నిపిస్తున్న తీరు ఆక‌ట్టుకుంటోంది. రామ్ కెరీర్ లోనే తొలిసారి ప‌వ‌ర్ ఫుల్ పోలీస్ ఆఫీస‌ర్ గా న‌టిస్తున్న ఈ మూవీని ఈ హీరో కెరీర్ లోనే అత్యంత భారీ బ‌డ్జెట్ తో నిర్మిస్తున్న‌ట్టుగా తెలుస్తోంది.

గ‌తంలో 20 నుంచి 25 కోట్ల లోపు బ‌డ్జెట్ తో మాత్ర‌మే సినిమాలు చేసిన రామ్ ఈ చిత్రాన్ని ఏకంగా 75 కోట్ల భారీ బ‌డ్జెట్ తో చేస్తుండ‌టం హాట్ టాపిక్ గా మారింది. మ‌రీ ఈ రేంజ్ లో ఖ‌ర్చు చేయ‌డంతో ఈ సినిమా బిజినెస్ పై ప్ర‌స్తుతం అంద‌రి దృష్టి ప‌డింది. రామ్ మార్కెట్ తో పోలిస్తే ఈ బ‌డ్జెట్ చాలా ఎక్కువ‌. మ‌రి ఆ స్థాయిలో బ‌య్య‌ర్స్ ఈ మూవీని కొంటారా? అన్న‌ది తెలియాలంటే జూన్ వ‌ర‌కు వేచి చూడాల్సిందే అంటున్నాయి ట్రేడ్ వ‌ర్గాలు. దేవి శ్రీ‌ప్ర‌సాద్ సంగీతం అందించిన ఈ చిత్రంలోని కీల‌క పాత్ర‌ల్లో న‌దియా, భార‌తీరాజా, చిరాగ్ జైన్‌, రెడిన్ కింగ్స్‌లే న‌టిస్తున్నారు.