ముద్ర 'నిఖిల్ ముద్ర' గా మారనుందా?

యంగ్ హీరో నిఖిల్ ప్రస్తుతం 'ముద్ర' అనే చిత్రంలో నటిస్తున్న విషయం తెలిసిందే. తమిళ సూపర్ హిట్ 'కనిదన్' కు రీమేక్ గా తెరకెక్కుతున్న ఈ చిత్రానికి ఇప్పుడు టైటిల్ విషయంలో చిక్కొచ్చిపడిందట. నిఖిల్ అండ్ టీమ్ మొదటి నుండి ఈ సినిమా కు 'ముద్ర' అనే టైటిల్ అనుకుంటున్నారు.. అదే వర్కింగ్ టైటిల్ కూడా.

అయినా 'ముద్ర' టైటిల్ ని ఫిలిం ఛాంబర్ లో రిజిస్టర్ చేయించలేదట. ఈ సినిమా నిర్మాతలు 'ముద్ర' ను రిజిస్టర్ చేసేలోపు వేరే నిర్మాతలు సేమ్ టైటిల్ ని రిజిస్టర్ చేయించడంతో ఇప్పుడు చిక్కొచ్చింది. వారు నిఖిల్ సినిమా కోసం ఆ టైటిల్ ను ఇచ్చేందుకు ఎంతమాత్రం అంగీకరించడం లేదట. దీంతో ఇప్పుడు నిఖిల్ నిర్మాతలు వేరే టైటిల్ ను వెతుక్కోవలసిన అవసరం ఏర్పడింది. ఇక ఫిలిం యూనిట్ లో కొందరు సభ్యులకు ఈ టైటిల్ మొదటి నుండి నచ్చలేదట.. ఇలాగైనా వేరొక మంచి టైటిల్ పెట్టే అవకాశం వచ్చిందని భావిస్తుంటే మరికొందరు మాత్రం ఇప్పటికే ఈ టైటిల్ జనాల్లోకి వెళ్లిందని.. మార్చాల్సిన పనిలేకుండా టైటిల్ కి ముందు నిఖిల్ అని తగిలించి 'నిఖిల్ ముద్ర' చేస్తే సరిపోతుందని అంటున్నారట. గతంలో 'మహేష్ ఖలేజా'.. 'కళ్యాణ్ రామ్ కత్తి' లాంటివి ఇలా జరిగినవేనని గుర్తు చేస్తున్నారు.

మరి కొత్త టైటిల్ ను ఫిక్స్ చేస్తారా లేదా 'నిఖిల్ ముద్ర' గా మారుస్తారా అనేది త్వరలోనే తెలుస్తుంది. ఇది టైటిల్ సంగతి. ఇక సినిమా విషయానికి వస్తే లావణ్య త్రిపాఠి నిఖిల్ కి జోడీగా నటిస్తోంది. ఇన్వెస్టిగేటివ్ జర్నలిస్ట్ పాత్రలో ఫేక్ సర్టిఫికేట్ రాకెట్ తో ఫైట్ చేసే వ్యక్తిగా నిఖిల్ నటిస్తున్నాడు. ఈ థ్రిల్లర్ త్వరలోనే ప్రేక్షకుల ముందుకు రానుంది.