'ముగ్గురు మొనగాళ్ళు' థియేటర్లలోకి వస్తున్నారు..!

శ్రీనివాస్‌ రెడ్డి ఓవైపు హాస్యనటుడిగా సినిమాలు చేస్తూనే అవకాశం వచ్చినప్పుడు హీరోగా కూడా చేస్తున్నారు. 'గీతాంజలి' 'జయమ్ము నిశ్చయమ్మురా' వంటి సినిమాలలో హీరోగా ఆకట్టుకున్న శ్రీనివాస్‌ రెడ్డి.. ఇప్పుడు ''ముగ్గురు మొనగాళ్లు'' అనే అవుట్‌ అండ్‌ అవుట్‌ కామెడీ ఎంటర్‌టైనర్‌ తో ప్రేక్షకుల ముందుకు వస్తున్నాడు. శ్రీనివాస్‌ రెడ్డి తో పాటుగా ఈ చిత్రంలో 'దియా' ఫేమ్‌ దీక్షిత్‌ శెట్టి - వెన్నెల రామారావు ఇతర ప్రధాన పాత్రలు పోషించారు. ఇప్పటికే విడుదలైన ఫస్ట్‌ లుక్‌ - టీజర్ - ట్రైలర్ సినిమాపై ఆసక్తిని కలిగించాయి. ఇప్పటికే పోస్ట్‌ ప్రొడక్షన్‌ కార్యక్రమాలు పూర్తి చేసుకున్న ఈ చిత్రాన్ని విడుదలకు సిద్ధం చేశారు.

''ముగ్గురు మొనగాళ్లు'' చిత్రాన్ని ఆగస్ట్ 6న థియేటర్స్ లో రిలీజ్ చేయనున్నట్లు మేకర్స్ అధికారికంగా ప్రకటించారు. థియేటర్లలో ట్రిపుల్ ఫన్ కు రెడీగా ఉండండి అని చెప్తూ రిలీజ్ డేట్ తెలిసేలా ఓ పోస్టర్ ని విడుదల చేశారు. ఇందులో శ్రీనివాస్ రెడ్డి చెవిటివాడిగా.. దీక్షిత్ శెట్టి మూగవాడిగా.. వెన్నెల రామారావు అంధుడిగా కనిపించనున్నారు. ఈ ముగ్గురూ ఓ క్రైమ్ కేసు విషయంలో పోలీసులకు సహాయం చేసి నిందితుడిని ఎలా పట్టించారు అనే కాన్సెప్ట్ తో ఈ సినిమా రూపొందింది.

'ముగ్గురు మొనగాళ్లు' చిత్రానికి అభిలాష్‌ రెడ్డి దర్శకత్వం వహిస్తున్నారు. చిత్రమందిర్‌ స్టూడియోస్‌ పతాకంపై పి.అచ్యుత్‌ రామారావు ఈ సినిమాను నిర్మిస్తున్నారు. ఈ చిత్రంలో ట్విషా శర్మ - శ్వేత వర్మ - నాజర్ - రాజా రవీంద్ర - జెమిని సురేష్ - జోష్ రవి - బద్రామ్ - సూర్య - జబర్దస్త్ సన్నీ - సినీ జర్నలిస్ట్ టీఎన్నార్ తదితరులు ఇతర పాత్రల్లో నటించారు. గరుడవేగ అంజీ ఈ చిత్రానికి సినిమాటోగ్రఫీ అందించారు. సురేష్ బొబ్బిలి సంగీతం సమకూర్చగా.. చిన్నా నేపథ్య సంగీతం అందించారు. బి. నాగేశ్వరరెడ్డి ఎడిటింగ్ వర్క్ చేయగా.. నాని ఆర్ట్ డైరెక్టర్ గా వ్యవహరించారు.