స్టార్ల నుండి బాగా పిండుతున్న ముంబై ఏజెన్సీ

ఇటీవ‌లి కాలంలో సౌత్ నుంచి ఉత్త‌రాదికి వెళ్లి సెటిల‌య్యేందుకు కొంద‌రు అగ్ర తార‌లు ప్ర‌య‌త్నిస్తున్న సంగ‌తి తెలిసిందే. వీళ్ల‌లో ముంబై నుంచి వ‌చ్చి సౌత్ లో స్థిర‌ప‌డి త‌ర్వాత తిరిగి సొంత గూటికి చేరుతున్న భామ‌లు ఉండ‌గా.. ఇప్పుడు చెన్నై హైద‌రాబాద్ తో అనుబంధం ఉండి ముంబైలో స్థిర‌ప‌డ‌డానికి వెళ్లిన మ‌రో పాపుల‌ర్ క‌థానాయిక కూడా ఉంది.

అయితే స‌ద‌రు ప్ర‌ముఖ‌ క‌థానాయిక నుంచి ఓ ముంబై ఏజెన్సీ భారీ మొత్తాన్ని ముక్కు పిండి మ‌రీ వ‌సూలు చేస్తోంద‌ని తెలిసింది. నిజానికి క‌థానాయిక‌ల‌కు ఆఫ‌ర్ ఇవ్వ‌గానే అటు ప్రొడ‌క్ష‌న్ కంపెనీ నుంచి భారీగా గుంజేసే స‌ద‌రు పీఆర్ కంపెనీ ఇటు స్టార్ నుంచి కూడా అంతే పెద్ద మొత్తాన్ని వ‌సూలు చేస్తోంద‌ని కూడా తెలిసింది.

మొన్న‌టికి మొన్న పాపుల‌ర్ షో 'కాఫీ విత్ క‌ర‌ణ్ సీజ‌న్ 7'లో మూడో ఎపిసోడ్ తో అట్టుడికించిన స‌ద‌రు క‌థానాయిక ఇంత‌లోనే నాలుగు బాలీవుడ్ సినిమాల‌కు క‌మిట‌వ్వ‌డం ఆశ్చ‌ర్య‌ప‌రిచింది. త‌న వ్య‌క్తిగ‌త జీవితంలో కుదుపు అనంత‌రం ఇక అడ్డూ ఆపూ లేకుండా ఎదుగుద‌లే ధ్యేయంగా పావులు క‌దుపుతోంది.

అదే క్ర‌మంలో ముంబైకి చెందిన పాపుల‌ర్ ఏజెన్సీతో భారీ ఒప్పందం కుదుర్చుకుంది. ఈ డీల్ వెరీ బిగ్ డీల్ అని తెలిసింది. దీనికోసం కోట్లలో ముట్టజెప్పింద‌న్న గుస‌గుస కూడా వినిపిస్తోంది. అయితే దానికి త‌గ్గ‌ట్టే త‌న‌కు ఏడాదికి 20కోట్లు త‌గ్గ‌కుండా సంపాదించుకునేంత పెద్ద ఆఫ‌ర్ల‌ను త‌ను అందుకుంటోంది.

ఓవైపు సినిమాలు మ‌రోవైపు వాణిజ్య ప్ర‌క‌ట‌న‌ల‌తో భారీ మొత్తాల‌ను స‌ద‌రు క‌థానాయిక ఆర్జిస్తోంది. ఇక ఆ ఏజెన్సీ పేరున్న ఏజెన్సీ కావ‌డంతో ఎంత అడిగితే అంతా స‌మ‌ర్పించుకోవాల్సి వ‌చ్చింద‌ట‌.

దానికి త‌గ్గ‌ట్టే అవ‌కాశాల్ని తెస్తోంది ఆ కంపెనీ. ఒక్కో సినిమాకి 4కోట్లు తీసుకున్నా నాలుగు సినిమాల‌కు 15 కోట్లు అనుకున్నా.. ప్ర‌క‌ట‌న‌ల ఆదాయం మ‌రో 4కోట్ల వ‌ర‌కూ ఉంటుంద‌ని భావించినా.. ఏడాదికి 20కోట్లు సునాయాసంగా ఆర్జించే అవ‌కాశాన్ని క‌ల్పించిన స‌ద‌రు ఏజెన్సీ ఫోటోని ఆ క‌థానాయిక త‌న‌ దేవుని గ‌దిలో పెట్టుకుని పూజిస్తే త‌ప్పేమీ కాద‌ని విశ్లేషిస్తున్నారు.