ఎన్టీఆర్ బయోపిక్: చక్రపాణిగా మురళీశర్మ

ఇప్పుడు బయోపిక్ ల కాలం నడుస్తోంది. మొన్ననే సావిత్రి జీవితగాథ ఆధారంగా తెరకెక్కిన మహానటి బాక్సాఫీస్ వద్ద సంచలన హిట్ అయ్యి కలెక్షన్ల వర్షం కురిసింది. తెలుగులో చేసిన ఈ తొలి ప్రయోగం విజయవంతం కావడంతో ఇప్పుడు అందరి దృష్టి ఎన్టీఆర్ బయోపిక్ పై పడింది.

మహానటి సినిమా కోసం అలనాటి ప్రముఖులకు సరిపడేలా కాస్టింగ్ ను ఎంచుకున్నారు. వారు దానికి బాగా సూటయ్యారు కూడా.. నాగేశ్వరరావు పాత్రలో ఆయన మనవడు నాగాచైతన్య - నిర్మాత చక్రపాణి పాత్రలో ప్రకాష్ రాజ్, ఇక అవసరాల శ్రీనివాస్ - క్రిష్ లు కూడా అప్పటి దర్శకులుగా కనిపించారు. ఆ పాత్రలకు బాగా సూటయ్యి ప్రాణం పోశారు.

తాజాగా ఎన్టీఆర్ బయోపిక్ గురించి ఓ ఇంట్రస్టింగ్ అప్ డేట్ బయటకు వచ్చింది. ఇప్పటికే ఎన్టీఆర్ రాజకీయ జీవితంలో కీలక పాత్ర పోషించిన నాదేండ్ల భాస్కర్ రావు పాత్రకు హిందీ నటుడు సచిన్ ఖేద్కర్ పేరు వినిపిస్తోంది. ఇక ఏఎన్నార్ గా సుమంత్ - సావిత్రిగా మరోసారి కీర్తి సురేష్..ఇక ఈ మూవీలో హీరోయిన్ గా బసవతారకం పాత్రలో విద్యాబాలన్ నటిస్తోంది.

తాజాగా విలక్షణ తెలుగు నటుడు మురళీ శర్మ ఎన్టీఆర్ బయోపిక్ చిత్రంలో నటించబోతున్నారు. ఎన్టీఆర్ తో పాతాళభైరవి లాంటి సినిమా తీసిన అలనాటి నిర్మాత చక్రపాణి పాత్రకు మురళీ శర్మను తీసుకున్నట్టు సమాచారం బయటకు వచ్చింది. ‘మహానటి’ సినిమాలో ఈ పాత్రను ప్రకాష్ రాజ్ చేశారు. ఆయన ఎంతో చక్కగా ఆ పాత్రలో ఒదిగిపోయారు. మళ్లీ ఆయననే తీసుకోవడం ఎందుకని మురళీ శర్మ ను దర్శకుడు క్రిష్ ఎంపిక చేశాడట.. ఆయన కూడా ఈ పాత్రకు ఒప్పుకున్నాడు. కొన్ని రోజుల కిందటే ‘ఎన్టీఆర్’ బయోపిక్ చిత్రీకరణ మొదలైంది. ఎన్టీఆర్ జీవితంలో కీలకపాత్ర పోషించిన నిర్మాత చక్రపాణి పాత్రలో మురళీ ఎలా నటిస్తాడు..? ఎన్టీఆర్ కు - చక్రపాణికి సంబంధం ఏంటనేది తెరపైనే చూడాలి. వచ్చే ఏడాది సంక్రాంతికి ఈ చిత్రం ప్రేక్షకుల ముందుకు రాబోతోంది.