సర్కారు వారి మాస్ మెలోడీ.. 'మురారి బావ' వచ్చేసింది..!

సూపర్ స్టార్ మహేష్ బాబు హీరోగా నటించిన తాజా చిత్రం ''సర్కారు వారి పాట''. పరశురాం పెట్లా దర్శకత్వంలో తెరకెక్కిన ఈ సినిమా.. తొలి రోజే మిక్స్డ్ రెస్పాన్స్ తెచ్చుకుంది. అయినప్పటికీ టాక్ తో సంబంధం లేకుండా వసూళ్ళు రాబడుతూ.. మూడో వారంలో అడుగుపెట్టింది.

ఇప్పుడు కొత్త సినిమాలు థియేటర్లలో సందడి చేస్తున్న తరుణంలో.. ప్రేక్షకులు మరియు అభిమానుల దృష్టిని ఆకర్షించడానికి SVP మేకర్స్ సరికొత్త ప్లాన్ తో ముందుకు వచ్చారు. సినిమాలో అదనంగా 'మురారి బావ' అనే మరో పాటని జత చేస్తున్నారు.

'సర్కారు వారి పాట' సినిమా కోసం ఎస్ఎస్ థమన్ స్వరపరిచిన పాటలు చార్ట్ బస్టర్ గా నిలిచాయి. 'కళావతి' 'పెన్నీ' 'మా మా మహేష్' వంటి సాంగ్స్ ఆడియన్స్ ను విశేషంగా ఆకట్టుకున్నాయి. అయితే తమన్ ఈ సినిమా కోసం 'మ మ మహేశా' కంటే ముందుగా 'మురారి బావ' అనే సాంగ్ ని కంపోజ్ చేశారు.

అయితే సినిమా అంతా చూసిన తర్వాత ఒక మాస్ సాంగ్ ఉంటే బావుంటుందని భావించిన మేకర్స్.. 'మురారి బావ' ప్లేస్ లో 'మ మ మహేశా' పాటని తీసుకొచ్చారు. అభిమానుల కోసం పాటను యూట్యూబ్ లో రిలీజ్ చేస్తామని మహేష్ బాబు చెప్పారు. కానీ ఇప్పుడు బిగ్ స్క్రీన్ మీదకే తీసుకొచ్చినట్లు మేకర్స్ ప్రకటించారు.

''అత్యంత ఎదురుచూస్తున్న మాస్ మెలోడీ 'మురారి బావ' పాట పెద్ద స్క్రీన్లలో 'సర్కారు వారి పాట' కి జోడించబడింది'' అని SVP టీమ్ ట్వీట్ లో పేర్కొంది. మహేశ్ - కీర్తి సురేష్ లపై షూట్ చేసిన ఈ పాటకు అనంత్ శ్రీరామ్ లిరిక్స్ రాసారు. అర్మాన్ మాలిక్ - గీతా మాధురి కలిసి ఆలపించారు.

'సర్కారు వారి పాట' చిత్రాన్ని మైత్రీ మూవీ మేకర్స్ - జీఎంబీ ఎంట‌ర్‌టైన్‌మెంట్ ప్రై.లి - 14 రీల్స్ ప్ల‌స్‌ సంస్థలు సంయుక్తంగా ఈ చిత్రాన్ని నిర్మించాయి.