చిరు సంగతేమో కానీ.. అక్కడ ఓకే

డాడీ ‘కత్తి’ రీమేక్ లో నటిస్తున్నాడు.. అని రామ్ చరణ్ నొక్కి వక్కాణించాక కూడా ఈ ప్రాజెక్టు విషయంలో ఇంకా సందేహాలు వీడిపోలేదు. ముహూర్తం జరుపుకున్నాక కూడా కొన్ని సినిమాలు వెనక్కి వెళ్లిపోతున్న నేపథ్యంలో చిరంజీవి షూటింగులో పాల్గొన్న స్టిల్స్ బయటికి వస్తే తప్ప ఆయన రీఎంట్రీ మూవీ గురించి జనాలు నమ్మకాలు పెట్టుకునే పరిస్థితి. ‘కత్తి’ రీమేకే చిరు రీఎంట్రీ మూవీ అని ఫిక్సయి కూడా ఆరు నెలలు దాటిపోయింది. రీమేక్ స్క్రిప్టుకు ఇంత టైం తీసుకుంటుండటం సందేహాలు రేకెత్తిస్తోంది. ఇంతకీ చిరు ‘కత్తి’ రీమేక్ ను ఎప్పుడు మొదలుపెడతాడో ఏమో కానీ.. బాలీవుడ్ లో మాత్రం ఈ సినిమా రీమేక్ అయిపోతోంది.

తన మిత్రుడు అక్షయ్ కుమార్ హీరోగా హిందీలో ‘కత్తి’ని రీమేక్ చేయడానికి మురుగదాస్ సన్నాహాలు పూర్తి చేశాడు. ఐతే ఈ చిత్రానికి అతడు దర్శకత్వం వహించడు. చాలా ఏళ్లుగా మురుగ దగ్గర అసిస్టెంటుగా పని చేస్తున్న జగన్ ఈ చిత్రంతో దర్శకుడిగా పరిచయం కాబోతున్నాడు. అక్షయ్ సరసన తాప్సి హీరోయిన్ గా నటిస్తుండటం విశేషం. ఆమె ఇప్పటికే ‘బేబీ’ సినిమాలో అక్షయ్ తో కలిసి నటించింది. ఇంకొన్ని రోజుల్లోనే ఈ చిత్రం సెట్స్ మీదికి వెళ్లనుంది. అక్షయ్ ఇంతకుముందు మురుగదాస్ సినిమా ‘తుపాకి’ రీమేక్ లోనూ నటించాడు. ఆ చిత్రం పెద్ద హిట్టయింది కూడా. మరి ‘కత్తి’ రీమేక్ ఎలాంటి ఫలితాన్నిస్తుందో చూడాలి.