మురుగదాస్ నోటి నుంచి ఆ మాటవచ్చేసింది

కలశంలో పోస్తేనే తీర్థం అయినట్లు.. సినిమాలకు సంబంధించిన సమాచారం ఏదైనా ఆ చిత్ర యూనిట్ సభ్యుల నోటి నుంచి వస్తేనే అధికారికం. సోషల్ మీడియా.. వెబ్ మీడియా.. బాగా యాక్టివ్ అయిపోయిన ఈ రోజుల్లో ఉత్తుత్తి ప్రచారాలు ఎక్కువైపోయాయి. అందుకే అధికారిక సమాచారం వస్తే తప్ప ఏ విషయాన్నీ నమ్మట్లేదు జనాలు. మహేష్ బాబు-మురుగదాస్ కాంబినేషన్లో రాబోయే సినిమాలో హీరోయిన్ ఎవరనే విషయంలోనూ కొన్ని రోజులుగా రకరకాల ప్రచారాలు జరిగాయి. పరిణీతి అన్నారు.. తర్వాత ఆమెను తప్పించేసి రకుల్ ప్రీత్ సింగ్‌ను తీసుకున్నారన్నారు. మొత్తానికి ఏ వార్త నమ్మాలో తెలియని పరిస్థితి.

ఐతే ఈ రోజు స్వయంగా మురుగదాసే ఈ విషయంలో క్లారిటీ ఇచ్చేశాడు. తమ సినిమాలో రకుల్ ప్రీత్ సింగ్ హీరోయిన్ గా నటించబోతున్న సంగతి వాస్తవమే అని ట్విట్టర్లో ప్రకటించాడు. రకుల్ కూడా వెంటనే ఆ ట్వీట్ మీద స్పందించింది. మీతో.. మహేష్ సార్ తో కలిసి పని చేయబోతుండటం నాకు దక్కిన గౌరవం అంటూ ఉప్పొంగిపోయింది. ఈ సినిమాలో ఎస్.జె.సూర్య విలన్ పాత్ర పోషిస్తున్న సంగతి తెలిసిందే. స్వయంగా సూర్యనే ఓ ఇంటర్వ్యూలో ఈ సంగతి వెల్లడించాడు. ఎన్వీ ప్రసాద్.. ఠాగూర్ మధు నిర్మించే ఈ చిత్రం ఈ నెలాఖరులోనే సెట్స్ మీదికి వెళ్తుంది. దాదాపు రూ.90 కోట్ల బడ్జెట్లో ఈ సినిమాను తెరకెక్కించబోతున్నారు. వచ్చే ఏడాది వేసవికి రిలీజ్ చేయాలన్నది ప్లాన్.