మరోసారి సూపర్‌ స్టార్‌ తో మురుగ..!

టాలీవుడ్‌ సూపర్‌ స్టార్‌ మహేష్‌ బాబు - తమిళ స్టార్‌ డైరెక్టర్‌ మురుగదాస్‌ ల కాంబినేషన్‌ లో వచ్చిన ‘స్పైడర్‌’ చిత్రం తీవ్రంగా నిరాశ పర్చిన విషయం తెల్సిందే. భారీ అంచనాల నడుమ - భారీ బడ్జెట్‌ తో రూపొందిన ‘స్పైడర్‌’ చిత్రం నిర్మాతలను మరియు డిస్ట్రిబ్యూటర్లను భారీగా నష్టపర్చింది. స్పైడర్‌ ఫలితంతో సంబంధం లేకుండా మురుగదాస్‌ తన తదుపరి చిత్రాన్ని తమిళ స్టార్‌ హీరో విజయ్‌ తో తెరకెక్కిస్తున్నాడు. విజయ్‌ - మురుగదాస్‌ ల ‘సర్కార్‌’ చిత్రం విడుదలకు ముస్తాభవుతోంది.

‘సర్కార్‌’ చిత్రం ప్రేక్షకుల ముందుకు రాకుండానే మురుగదాస్‌ మరో ప్రాజెక్ట్‌ ను పట్టాలెక్కించేందుకు సిద్దం అవుతున్నట్లుగా తమిళ మీడియా వర్గాల్లో సమాచారం అందుతుంది. ఈ సారి తమిళ సూపర్‌ స్టార్‌ రజినీకాంత్‌ తో మురుగదాస్‌ చిత్రం చేసేందుకు సన్నాహాలు చేస్తున్నాడు. ఇప్పటికే రజినీకాంత్‌ ను తన వద్ద ఉన్న ఒక స్టోరీ లైన్‌ తో మురుగదాస్‌ ఒప్పించినట్లుగా సమాచారం అందుతుంది. త్వరలోనే వీరిద్దరి కాంబో మూవీ గురించి అధికారిక ప్రకటన వచ్చే అవకాశం ఉందని తమిళ సినీ వర్గాల నుండి సమాచారం అందుతుంది.

‘కాలా’ చిత్రం తర్వాత స్పీడ్‌ పెంచిన సూపర్‌ స్టార్‌ రజినీకాంత్‌ ఇప్పటికే కార్తీక్‌ సుబ్బరాజు దర్శకత్వంలో ‘పెట్ట’ అనే చిత్రాన్ని చేస్తున్నాడు. ఆ చిత్రం షూటింగ్‌ శరవేగంగా జరుగుతుంది. ఆ చిత్రం పూర్తి అయిన తర్వాత అంటే 2019లో సూపర్‌ స్టార్‌ రజినీకాంత్‌, ఏఆర్‌ మురుగదాస్‌ ల కాంబోలో మూవీ పట్టాలెక్కే అవకాశం ఉంది. మన సూపర్‌ స్టార్‌ కు సక్సెస్‌ ను ఇవ్వడంలో విఫలం అయిన మురుగదాస్‌ తమిళ సూపర్‌ స్టార్‌ కైనా సూపర్‌ హిట్‌ ను ఇస్తాడా అనేది చూడాలి.