నయన్ కు ఆ దర్శకుడు మళ్లీ హ్యాండిచ్చారా?

కొన్ని కాంబినేషన్లు ఎంత బాగా వర్క్ వుట్ అవుతాయో.. మరికొన్ని కాంబినేషన్లు లేనిపోని వివాదాలకు తెర తీస్తుంటాయి. అగ్ర నటి అన్న ట్యాగ్ తో పాటు.. తన అందాలతో కుర్రకారు మనసుల్ని దోచేసే సీనియర్ నటిగా నయనతారను చెప్పాలి. చూసినంతనే మళ్లీ.. మళ్లీ చూడాలనిపించే అందంతో పాటు.. తెలీని ఆకర్షణ ఆమె గురించి ఆలోచించేలా చేస్తుంటుంది. దీనికి తోడు ఆమె గ్రేస్ మంత్రముగ్దుల్ని చేస్తుంటుంది.

పాత్రల్లోకి పరకాయ ప్రవేశం చేసే నయనతార ఎంతోమంది దర్శకులతో పని చేసినా.. అగ్ర దర్శకుడు మురుగదాస్ తో చేసిన ప్రతిసారీ దెబ్బ పడుతుందన్న వాదన వినిపిస్తూ ఉంటుంది. అప్పట్లో ఆమె మురుగదాస్ తో కలిసి చేసిన గజనీ చిత్రంలో తన పాత్రను పేలవంగా చిత్రీకరించాడని.. ఆ సినిమాతో తనకెలాంటి మైలేజీ రాలేదన్న ఆగ్రహంతో ఆ తర్వాత నయన్ మళ్లీ ఆయనతో సినిమా చేయలేదు.

చాలా గ్యాప్ తర్వాత తాజాగా రజనీకాంత్ దర్బార్ లో పని చేసింది. అప్పటి గజనీ అనుభవాన్నే తాజా దర్బార్ మిగిల్చిందన్నట్లుగా నయన్ ఫీల్ అవుతుందట. తన పాత్రను ఏ మాత్రం ఎలివేట్ చేయకుండా.. సినిమా మొత్తం రజనీతో నింపేశారని.. తనకీ సినిమాలో అన్యాయం జరిగిందన్న భావనలో నయన్ ఉన్నట్లు చెబుతున్నారు. సినిమా మొత్తం రజనీ వన్ మ్యాన్ షోలా మారిందని.. తన పాత్రకు ఇవ్వాల్సిన కనీస ప్రాధాన్యత ఇవ్వలేదని ఫీల్ అవుతుందట.

సినిమాలో నయన్ గ్లామర్ గా కనిపించినప్పటికీ.. ఆమెను ఎలివేట్ చేయటంతో పాటు.. ఆమెలోని నటిని చూపించే అవకాశం ఇవ్వలేదంటున్నారు. నటిగా ఏ మాత్రం గుర్తింపు లభించలేదని ఫీల్ అవుతున్నట్లు చెబుతున్నారు. మురుగదాస్ ను నమ్మిన తనకు మరోసారి దెబ్బ పడిందన్న ఆగ్రహంతో ఉన్నట్లు చెబుతున్నారు. ప్రేక్షకుల్లో తనకున్న ఇమేజ్ ను ఎలివేట్ చేయటంలో దర్శకుడు ఫెయిల్ అయ్యారని తన సన్నిహితుల వద్ద నయన్ ఫీలవుతున్నట్లుగా వార్తలు వస్తున్నాయి. ఇందులో నిజమెంత అన్నది నయన్ క్లారిటీ ఇస్తే కానీ కన్ఫ్యూజన్ క్లియర్ కాదు.