నా పిల్ల‌ల ఇంటిపేరు 'మిర్జా మాలిక్': సానియా

భార‌త టెన్నిస్ స్టార్ సానియా మిర్జా తల్లి కాబోతోందంటూ కొద్ది రోజులుగా పుకార్లు వినిపిస్తోన్న సంగ‌తి తెలిసిందే. ఆ వ‌దంతుల‌కు ఊత‌మిచ్చేలా సానియా మిర్జా తాజాగా ఓ విష‌యాన్ని వెల్ల‌డించింది. భ‌విష్య‌త్తులో త‌న‌కు పుట్ట‌బోయే బిడ్డ ఇంటిపేరు `మిర్జా మాలిక్` అని పెట్ట‌బోతున్నాన‌ని తెలిపింది. గోవా ఫెస్ట్ -2018 లో పాల్గొన్న సానియా `లింగ వివ‌క్ష‌` అనే అంశంపై చ‌ర్చ సంద‌ర్భంగా ఈ వ్యాఖ్య‌లు చేసింది. త‌నకు ఆడ‌పిల్ల పుట్టాల‌ని భ‌ర్త షోయ‌బ్ మాలిక్ కోరుకుంటున్నాడ‌ని తెలిపింది. త‌మ సంతానానికి `మిర్జా మాలిక్ `అనే ఇంటిపేరుంటుంద‌ని, త‌మ ఇద్దరి ఇంటిపేర్లు వారి పేర్ల‌కు ముందు ఉంటాయ‌ని స్ఫ‌ష్టం చేసింది. త‌న పెళ్లి త‌ర్వాత త‌న ఇంటిపేరు మార్చుకోలేద‌ని ఆమె గుర్తు చేసింది.

పాక్ క్రికెట‌ర్ షోయ‌బ్ మాలిక్ తో పెళ్ల‌యిన త‌ర్వాత కూడా త‌న ఇంటిపేరు మార్చుకోలేద‌ని, అది అలాగే కొన‌సాగుతుందని చెప్పింది. అదే విధంగా త‌న పిల్ల‌లు కూడా తన ఇంటిపేరును ముందుకు తీసుకెళ్లాల‌ని తాను భావిస్తున్నాన‌ని చెప్పింది. ఈ విష‌యాన్ని త‌న భ‌ర్త షోయ‌బ్ మాలిక్ తో కూడా చ‌ర్చించాన‌ని, త‌మకు పుట్ట‌బోయే పిల్ల‌ల పేర్ల ముందు త‌మ ఇద్దరి ఇంటిపేర్లు క‌లిపి ఉంచాల‌ని తాము నిర్ణ‌యించుకున్నామ‌ని తెలిపింది.

అయితే, సానియా త‌ల్లి కాబోతోంద‌న్న పుకార్ల‌కు తాజాగా సానియా చేసిన వ్యాఖ్య‌లు ఊత‌మిచ్చేలా ఉన్నాయి. అయితే, ఇప్ప‌టివ‌ర‌కు సానియా - షోయ‌బ్ ల నుంచి, వారి కుటుంబాల నుంచి సానియా గ‌ర్భ‌వ‌తి అన్న విష‌యంపై ఎటువంటి అధికారిక ప్ర‌క‌ట‌న వెలువ‌డ‌లేదు.