ఇండియ‌న్ మైఖేల్ జాక్స‌న్ భూత‌మా?

గ‌త ఏడాది స‌ల్మాన్ ఖాన్ తో ప్ర‌భుదేవా చేసిన మూవీ `రాధే` ఆశించిన ఫ‌లితాన్ని అందించ‌లేక‌పోయింది. దీంతో మ‌రో సినిమాని డైరెక్ట్ చేయ‌ని ప్ర‌భుదేవా న‌టుడిగా మాత్రం బ్యాక్ టు బ్యాక్ మూవీస్ చేస్తున్నారు. అయితే ఇండియ‌న్ మైఖేల్ జాక్స‌న్ గా త‌న దైన డాన్సుల‌తో పేరు తెచ్చుకున్న ప్ర‌భుదేవా ఓ మూవీలో పిల్ల‌ల కోసం భూతంగా క‌నిపించ‌బోతున్నాడు. ఆయ‌న న‌టిస్తున్న ఓ మూవీని త‌మిళంలో అభిషేక్ ఫిల్మ్స్ బ్యాన‌ర్ పై ర‌మేష్ పిళ్లై నిర్మిస్తున్నారు.

ఎన్‌. రాఘ‌వ‌న్ ద‌ర్శ‌కుడు. తెలుగులో ఇదే మూవీని `మైడియ‌ర్ భూతం` పేరుతో శ్రీ‌ల‌క్ష్మీ జ్యోతి క్రియేష‌న్స్ బ్యాన‌ర్ పై ఏ.ఎన్‌. బాలాజీ విడుద‌ల చేస్తున్నారు. శ‌నివారం ప్రభుదేవా లుక్ కు సంబంధించిన పోస్ట‌ర్ ని చిత్ర బృందం విడుద‌ల చేసింది.

జీనీ త‌ర‌హాలో విచిత్ర‌మైన డ్రెస్ లో ప్ర‌భుదేవా క‌నిపిస్తున్న తీరు విశేషంగా ఆక‌ట్టుకుంటోంది. ప‌క్క‌నే స్కూల్ డ్రెస్ లో ఓ పిల్ల‌వాడు క‌నిపిస్తుండ‌గా ప్ర‌భుదేవా చేతిలో వున్న ఆయుధం మంత్ర‌దండంలా క‌నిపిస్తోంది.

ఫాంట‌సీ అంశాల నేప‌థ్యంలో ఆద్యంతం ఆస‌క్తిక‌రంగా పిల్ల‌ల‌ని ఎంట‌ర్ టైన్ చేయాల‌నే ల‌క్ష్యంతో ఈ మూవీని రూపొందించిన‌ట్టుగా క‌నిపిస్తోంది. ప్ర‌భుదేవా జీనీగా న‌టిస్తున్నారు. ఫ‌స్ట్ లుక్ చూస్తుంటే ఈ పాత్ర‌లోకి త‌ను ప‌ర‌కాయ ప్ర‌వేశం చేసిన‌ట్టుగా క‌నిపిస్తోంది. ఈ మేకోవ‌ర్ కోసం ప్ర‌భుదేవా చాలా శ్ర‌మించిన‌ట్టుగా స్ప‌ష్ట‌మ‌వుతోంది.

ప్ర‌భుదేవాతో పాటు ఈ మూవీలోని కీల‌క‌ పాత్ర‌లో ర‌మ్య నంబీస‌న్ న‌టిస్తుండ‌గా ఇత‌ర పాత్ర‌ల్లో బిగ్ బాస్ ఫేమ్ సంయుక్త‌, ఇమ్మాన్ అన్నాచి, సురేష్ మీన‌న్‌, లొల్లు సభా, స్వామినాథ‌న్ న‌టిస్తున్నారు. ఈ చిత్రానికి సంగీతం డి.

ఇమాన్‌, యూకె సెంథిల్ కుమార్ సినిమాటొగ్ర‌ఫీ అందిస్తున్నారు. ప్ర‌స్తుతం వీఎఫ్ ఎక్స్ ప‌నుల్లో వున్న ఈ మూవీని త్వ‌ర‌లోనే రిలీజ్ డేట్ ని ప్ర‌క‌టించి తెలుగు, త‌మిళ భాష‌ల్లో విడుద‌ల చేయ‌బోతున్నారు.