తగ్గని మైత్రీ జోరు.. వరుణ్ తో సినిమా ఫిక్స్

వరస బ్లాక్ బస్టర్లతో ఇండస్ట్రీ మొత్తాన్ని తమవైపు తిప్పుకున్న మైత్రీ మూవీ మేకర్స్ వారికి వరసగా 'సవ్యసాచి'.. 'అమర్ అక్బర్ అంటోనీ' సినిమాలతో ఎదురుదెబ్బలు తగిలాయి. దీంతో మైత్రీ వారు తమ స్పీడ్ ను కాస్త తగ్గిస్తారనే అభిప్రాయం వ్యక్తమైంది. కానీ అలా ఏం లేదు.. ప్రాజెక్టులను లైన్లో పెట్టడంలో అదే జోరు చూపిస్తున్నారు.

తాజా సమాచారం మేరకు మెగా ప్రిన్స్ వరుణ్ తేజ్ తో ఒక సినిమా నిర్మించేందుకు ప్లాన్ చేశారట. ఈ సినిమాతో ఒక నూతన దర్శకుడు టాలీవుడ్ కు పరిచయం అవుతున్నాడట. రీసెంట్ గా వరుణ్ తేజ్ కు ఆ యువ దర్శకుడు ఒక ఇంట్రెస్టింగ్ స్టొరీ వినిపించడం.. గ్రీన్ సిగ్నల్ తీసుకోవడం చకచకా జరిగిపోయాయట. మైత్రీ బ్యానర్ లో ఈ సినిమా చేసేందుకు వరుణ్ తేజ్ కూడా తనవైపునుండి ఒకే చెప్పాడని సమాచారం. ఫుల్ స్క్రిప్ట్ నెరేషన్ అయిన తర్వాత జూన్ లో ఈ సినిమాను అధికారికంగా ప్రకటిస్తారని సమాచారం.

ప్రస్తుతం వరుణ్ తేజ్ రెండు సినిమాలు లైన్లో ఉన్నాయి. ఒకటి హరీష్ శంకర్ దర్శకత్వంలో చేస్తున్న 'వాల్మీకి'.. రెండో సినిమా కిరణ్ కొర్రపాటి అనే డెబ్యూ దర్శకుడి తో చేస్తున్న స్పోర్ట్స్ డ్రామా. ఈ రెండు సినిమాల తర్వాత మైత్రీ వారి సినిమా సెట్స్ మీదకు వెళ్ళే అవకాశం ఉంది. ఇదిలా ఉంటే మైత్రీ మూవీ మేకర్స్ బ్యానర్ మెగా హీరోలతో వరసబెట్టి ప్రాజెక్టులు సెట్ చేస్తోంది. చరణ్ తో 'రంగస్థలం' బ్లాక్ బస్టర్ సాధించిన మైత్రీవారు సాయి ధరమ్ తేజ్ తో 'చిత్రలహరి' సినిమాను నిర్మిస్తున్నారు. మరోవైపు తేజు తమ్ముడు వైష్ణవ్ తేజ్ ను హీరోగా పరిచయం చేస్తూ మరో సినిమా నిర్మిస్తున్నారు. ఇప్పుడు వరుణ్ తేజ్ సినిమాను లైన్లో పెట్టారు. చూస్తుంటే మెగా ఫ్యామిలీ మొత్తాన్ని కవర్ చేసేలా ఉన్నారే..!