వెంకీ మైత్రి ఎవరితో ఉండబోతుందో?

ఈమద్య కాలంలో తెలుగు నిర్మాణ సంస్థల్లో మైత్రి మూవీస్‌ వారు టాప్‌ లో ఉంటున్నారు. మైత్రి మూవీస్‌ బ్యానర్‌ లో చిన్నా పెద్దా అనే తేడా లేకుండా వరుసగా సినిమాలు నిర్మాణం అవుతున్నాయి. ప్రస్తుతం రెండు మూడు సినిమాలు లైన్‌ లో ఉండగానే మరి కొందరు హీరోలకు - దర్శకులకు అడ్వాన్స్‌ లు ఇస్తూనే ఉన్నారు. యువ హీరోల్లో పలువురి డేట్లు ప్రస్తుతం మైత్రి వారి వద్ద ఉన్నాయి. దర్శకులు కూడా పలువురు మైత్రి వారి వద్ద ఉన్నారు. ఈ ఏడాది నాలుగు అయిదు సినిమాలు మైత్రి నుండి రావడం ఖాయంగా కనిపిస్తుంది. తాజాగా మరో దర్శకుడికి కూడా మైత్రి వారు అడ్వాన్స్‌ ఇచ్చారట.

మొదటి చిత్రం 'తొలిప్రేమ'తో డీసెంట్‌ సక్సెస్‌ ను దక్కించుకున్న వెంకీ అట్లూరి ప్రస్తుతం అఖిల్‌ హీరోగా 'మిస్టర్‌ మజ్ను' చిత్రాన్ని తెరకెక్కిస్తున్నాడు. అఖిల్‌కు ఇది మొదటి సక్సెస్‌ కాబోతుంది అంటూ అక్కినేని అభిమానులతో పాటు అంతా కూడా చాలా నమ్మకంగా ఉన్నారు. టీజర్‌ మరియు పోస్టర్స్‌ ను చూస్తుంటే సినిమా తప్పకుండా ఆడుతుందనే నమ్మకం వ్యక్తం అవుతుంది. అందుకే మైత్రి వారు వెంటనే వెంకీ అట్లూరికి అడ్వాన్స్‌ ఇచ్చేసి బుక్‌ చేసుకున్నారు.

'మిస్టర్‌ మజ్ను' చిత్రం సక్సెస్‌ అయితే వెంకీ అట్లూరి దర్శకత్వంలో నటించేందుకు యువ హీరోలు పోటీ పడే అవకాశం ఉంది. అయితే వెంకీ అట్లూరికి మైత్రి వారు ఏ హీరోతో జత కలుపుతారనేది చూడాలి. వెంకీకి ఉన్న ఇమేజ్‌ దృష్ట్యా యంగ్‌ హీరోలతోనే తర్వాత సినిమా ఉండే అవకాశం ఉంది. మైత్రి వారి వద్ద నాని - విజయ్‌ దేవరకొండల డేట్లు ఉన్నాయి. ఆ ఇద్దరిలో ఏ హీరోతో అయినా వెంకీ అట్లూరి సినిమా ప్లాన్‌ చేస్తే చేయొచ్చు. లేదంటే మరే యంగ్‌ హీరోనైనా రంగంలోకి దించొచ్చు. మిస్టర్‌ మజ్ను ఫలితంను బట్టి వెంకీ అట్లూరి తదుపరి చిత్రం ఉంటుంది.