'నా నువ్వే' వచ్చేది అప్పుడే

నందమూరి కాంపౌండ్ నుంచి వచ్చినా తనకంటూ ప్రత్యేకమైన ఇమేజ్ కోసం ప్రయత్నిస్తున్న కళ్యాణ్ రామ్ పూర్తి మేకోవర్ తో కొత్తగా రెండు సినిమాల్లో కనిపించబోతున్నాడు. అందులో ఒకటి ‘నా నువ్వే’. మిల్కీ బ్యూటీ తమన్నా మొదటి సారి కళ్యాణ్ రామ్ తో జట్టు కట్టిన ఈ మూవీ రిలీజ్ డేట్ లాక్ చేసారు. మే 25న ప్రపంచవ్యాప్తంగా విడుదల చేసేందుకు నిర్ణయించుకున్నారు. తమన్నా రేడియో జాకీగా నటిస్తున్న ఈ మూవీ ఫీల్ గుడ్ లవ్ స్టొరీ. సిద్దార్థ్, ప్రియా ఆనంద్ లతో గతంలో 180 అనే సినిమాతో క్రిటిక్స్ ని సైతం మెప్పించిన జయేంద్ర దీనికి దర్శకత్వం వహించడం ప్లస్ గా మారింది. ఇప్పటికే విడుదలైన టీజర్ మంచి అంచనాలు రేకేత్తించగా ఫాన్స్ సైతం ఆశ్చర్యపోయేలా కళ్యాణ్ రామ్ లవ్ బాయ్ గా కనిపించడం ఆసక్తిని రేపుతోంది.

ప్రముఖ ఛాయాగ్రహకులు పిసి శ్రీరామ్ కెమెరా దీనికి మరో ప్రధాన ఆకర్షణ. ఇండియాలోనే టాప్ మోస్ట్ టెక్నీషియన్ అయిన శ్రీరామ్ పనితనం ఈ లవ్ స్టొరీని చాలా అందంగా చూపించబోతోందని టాక్. కిరణ్ ముప్పవరపు, విజయ్ వట్టికుటి నిర్మాతలుగా వ్యవరిస్తున్న 'నా నువ్వే'కు మహేష్ కోనేరు సమర్పకులు.సినిమా పరిశ్రమలో పిఆర్ఒగా సుదీర్ఘ అనుభవమున్న మహేష్ కోనేరు ఈ సినిమాతోనే నిర్మాణ రంగంలోకి అడుగు పెడుతున్నారు. కథ చాలా ఎగ్జైట్ చేయటంతో నిర్మాతగా మారానని చెబుతున్న మహేష్ కోనేరు అభిమానులనే కాక యూత్ కి కూడా 'నా నువ్వే' మర్చిపోలేని స్వీట్ మెమరీగా మిగులుతుందన్న భరోసా ఇస్తున్నారు.

కళ్యాణ్ రామ్ నిర్మాతగా గత ఏడాది జై లవకుశతో సక్సెస్ అందుకున్నాక మళ్ళి హీరోగా బిజీ అవుతున్నాడు. నా నువ్వే తో పాటు ఎమెల్యే (మంచి లక్షణాలున్న అబ్బాయి)కూడా విడుదలకు సిద్ధంగా ఉన్నప్పటికీ దాని డేట్ ఇంకా ఖరారు కావాల్సి ఉంది. 'నా నువ్వే' కళ్యాణ్ రామ్ కు ప్రామిసింగ్ వెంచర్ లాగా కనిపిస్తోంది. ట్రైలర్, ఆడియో వచ్చే నెలలో విడుదల చేసే ఆలోచనలో ఉంది 'నా నువ్వే' యూనిట్.