టీజర్ టాక్: ప్రేమలో ఎన్ని రంగులు కలిపారో

నందమూరి కళ్యాణ్ హీరోగా తెరకెక్కుతున్న సినిమా సంగతులను ఇవాళ ప్రకటిస్తామంటూ ముందే చెప్పింది మూవీ యూనిట్. చెప్పినట్లుగానే గ్లింప్స్ అంటూ కొత్త సినిమా టీజర్ విడుదల చేసేశారు. కళ్యాణ్ రామ్- తమన్నా జంటగా నటిస్తున్న ఈ చిత్రానికి నా నువ్వే అంటూ డిఫరెంట్ టైటిల్ నిర్ణయించడం విశేషం.

మాస్ ఇమేజ్ ఉన్న ఈ హీరో చిత్రానికి ఇలాంటి టైటిల్ అసలు ఊహించలేం. టీజర్ ప్రారంభం నుంచి చివరి వరకూ ఒక్క క్షణం కూడా మిస్ చేసుకోలేనంత అందంగా విజువల్స్ చూపించారు. ఓ అందమైన ప్రేమ కథ అని చెప్పినట్లుగానే.. మ్యూజిక్ థీమ్ కూడా సాగుతుంది. టైటిల్ లోగోలోనే మైక్ చూపించడం.. ఆర్జే గా తమన్నా కనిపించడం.. బాగున్నాయి. మిల్కీ అందాలు తళుక్కుమంటుంటే.. తానేమీ తక్కువ కాదంటున్నాడు కళ్యాణ్ రామ్. కనిపించీ కనిపించనట్లుగా మీసకట్టు.. కొత్త హెయిర్ స్టైల్ తో కళ్యాణ్ రామ్ లుక్ మరీ ఆకట్టుకుంటోంది. ఫీల్ బేస్డ్ లవ్ స్టోరీగా తెరకెక్కుతున్న నా నువ్వు చిత్రాన్ని 180 ఫేమ్ జయేంద్ర దర్శకత్వం వహిస్తున్నాడు.

పీసీ శ్రీరామ్ ఛాయాగ్రహణం.. ఈ మూవీకి హైలైట్ అవుతుందనే సంగతి.. టీజర్ లో కనిపించిన విజువల్స్ లోని రంగులను చూస్తేనే అర్ధమవుతుంది. సమ్మర్ లో ఈ చిత్రం రిలీజ్ అవుతుందంటూ టీజర్ లోనే చెప్పేయడం మెచ్చుకోదగ్గ విషయం. కళ్యాణ్ రామ్-తమన్నాల జంట అందిస్తున్న కొత్త తరహా ప్రేమకథ ఎలా ఉండనుందో చూద్దాం.