కొత్త ఏడాదిలో నభా నటేశ్ హవా!

నభా నటేశ్ .. ఇప్పుడు మాస్ కుర్రాళ్లు ఈ పేరును ఒక మంత్రంలా జపిస్తున్నారు. హాట్ హాట్ గా అందాలవిందు చేసే ఈ అమ్మాయిని తెరపై చూడటానికి తపిస్తున్నారు. ముద్దుగా బొద్దుగా కనిపించే ఈ బ్యూటీ, 'నన్నుదోచుకుందువటే' సినిమాతో తెలుగు తెరపై మెరిసింది. తొలి సినిమాలో ఈ అమ్మాయిని చూసినవారు, తన గ్లామర్ కి కాస్తంత మసాలా జోడిస్తే దుమ్మురేపేయడం ఖాయమని అనుకున్నారు. ఆ తరువాత ఈ సుందరి చేసిన 'ఇస్మార్ట్ శంకర్' సినిమా అదే విషయాన్ని నిజం చేసింది.

పూరి జగన్నాథ్ దర్శకత్వం వహించిన 'ఇస్మార్ట్ శంకర్' సినిమాలో ఈ అమ్మాయి చేసిన అందాల సందడి అంతా ఇంతా కాదు. బంతిపువ్వులాంటి ఈ భామ పెంచిన గ్లామర్ డోస్ కి యువకులు ఉక్కిరిబిక్కిరయ్యారు. ఈ సినిమాలోని పాటల్లో ఈ బ్యూటీ అందాలు ఒలకబోస్తుంటే, కుర్రాళ్ల కళ్లు అక్వేరియంలో చేపపిల్లల్లా కొట్టుకున్నాయి. అంతలా ఈ అమ్మాయి ఊరించింది .. ఊహల వెంట ఉరికించింది .. ఉత్సాహాన్ని పెంచింది. యూత్ లో నభా క్రేజ్ రాకెట్ లా దూకుపోయింది. దాంతో అవకాశాలు బాగానే పలకరిస్తున్నాయి.

నభా తాజా చిత్రంగా రూపొందిన 'సోలో బ్రతుకే సో బెటర్' ఈ నెల 25వ తేదీన థియేటర్స్ కి రానుంది. సాయిధరమ్ తేజ్ హీరోగా నిర్మితమైన ఈ సినిమాలో ఈ చిన్నది మరింత గ్లామరస్ గా కనిపించనున్నట్టు తెలుస్తోంది. 'సోలో బ్రతుకే సో బెటర్' అనుకున్న ఓ కుర్రాడిని ముగ్గులోకి దింపాలంటే మామూలు గ్లామర్ ఉంటే పనవుతుందా మరి! ఆ రేంజ్ లోనే నభా తన గ్లామర్ ను జాడించి .. ఆరేసిందనే అంటున్నారు. ఈ సినిమాతో తన క్రేజ్ మరింత పెరుగుతుందని స్ట్రాంగ్ గా చెబుతుందంటే, ఆమె జోరు ఏరులై పొంగిందనే అనుకోవాలి.

ఈ సినిమా తరువాత నభా నటేశ్ చేతిలో 'అల్లుడు అదుర్స్' .. 'అంధాదున్' తెలుగు రీమేక్ ఉన్నాయి. లాక్ డౌన్ తరువాత ఈ అమ్మాయిని కలుస్తున్న దర్శక నిర్మాతల సంఖ్య ఎక్కువగానే ఉందనే టాక్ ఫిల్మ్ నగర్లో బలంగానే వినిపిస్తోంది. అందాలు ఒలకబోయడానికి ఈ సుందరి ఎంతమాత్రం వెనకాడకపోవడంతో, యువ దర్శకులు ముందుగా ఆమె పేరునే పరిశీలిస్తున్నారని చెప్పుకుంటున్నారు. ఇదే ఊపు కొనసాగితే వచ్చే ఏడాదిలో నభా హవా కొనసాగే అవకాశాలు పుష్కలంగా ఉన్నాయని అంటున్నారు.