బిగ్ బాస్ 4 విజేత అభిజీత్ కి మెగా బ్ర‌ద‌ర్ ఆఫ‌రిస్తున్నారా?

`బిగ్ బాస్ 4` విజేత‌గా అభిజీత్ సంచ‌ల‌నం సృష్టించాడు. అత‌డిని పిలిచి వ‌ర‌స‌గా అవ‌కాశాలిచ్చేందుకు నిర్మాత‌లు సిద్ధంగా ఉన్నార‌న్న వార్త‌లు వినిపిస్తున్నాయి. అయితే మెగా బ్ర‌ద‌ర్ నాగ‌బాబు కూడా ఈ యువ హీరోకి అవ‌కాశం ఇచ్చి ఎంక‌రేజ్ చేస్తున్నారా? భారీ చిత్రాల నిర్మాత‌గా ఆయ‌న‌కంటూ ఓ ట్రాక్ రికార్డ్ ఉంది. ఇక ఇలాంటి యువ‌హీరోల్ని ప్రోత్స‌హించే విధంగా మెగా నిర్మాత అవ‌కాశాలు సృష్టిస్తే ఎంతో బావుంటుంది క‌దా? అన్న వాద‌నా వినిపిస్తోంది.

ఇక‌పోతే అభిజీత్ ని ఎంతగానో అభిమానించాన‌ని అత‌డు బిగ్ బాస్ విజేత‌గా నిల‌వాల‌ని కోరుకున్నాన‌ని కూడా నాగ‌బాబు అన్నారు. తాజా వీడియో చాట్ లో నాగ‌బాబు మాట్లాడుతూ-``బిగ్ బాస్ షోలో నాకు అవినాష్ మాత్రమే తెలుసు. మిగతా వాళ్లెవ్వరూ తెలీదు. సోష‌ల్ మీడియాలు .. ఇత‌రులు చెబితే విన్న‌వే కానీ.. షో చూడ‌లేదు.. రెండు మూడు సార్లు చూసిన దాంట్లో కూడా అభిజిత్ గురించి ఎక్కువగా విన్నాను చూశాను.. అతను గెలవాలని ఆశించాను`` అని అన్నారు. తాను ఊహించినట్టు అభిజిత్ గెలిచాడు. గెలిచాక అభిజిత్‌ను కలవాలనుకున్నాను. కానీ విజేత బిజీగా ఉంటాడని డిస్టర్బ్ చేయడం ఎందుకని ఊరుకున్నాను. కానీ అతనే ఫోన్ చేసి కలిసాడు అని తెలిపారు.

ఇక ఈ ముచ్చ‌ట్ల‌లోనే బిగ్ బాస్ ఇంట్లో హారిక మోనాల్ తో అభిజీత్ ల‌వ్ ట్రాక్ చ‌ర్చ‌కొచ్చింది. మోనాల్ తో ట్రాక్ ముగిశాక‌ హారికతో ట్రాక్ నడిపిస్తుంటే అది గేమ్ స్ట్రాటజీ అనుకున్నామని నాగబాబు అభిజీత్ ‌తో అన్నారు. అయితే హారిక‌ను తాను సిస్ట‌ర్ అని పిలిచాన‌ని నాగార్జున స‌ర్ ముందే అలా పిలిచినా ఎడిట్ చేసి వేరేలా ప్రొజెక్ట్ చేశారని అభిజీత్ ఆవేద‌న చెందాడు. అయితే అభిజీత్ పై నెగెటివిటీ రాక‌పోగా ఆ ఎపిసోడ్ అనంత‌రం అభిజీత్ ని స‌మ‌ర్థిస్తూ హోస్ట్ నాగార్జునను దారుణంగా ట్రోల్ చేశారని ఏకిపారేశారని నాగ‌బాబు అన్నారు.

మోనాల్ విషయం మోకాళ్ల మీద నిలబడి క్షమించమన్నప్పుడు నాగార్జుననే ట్రోల్ చేశారంటూ చెప్పుకొచ్చారు. తాజా చిట్ చాట్ ని బ‌ట్టి అభిజీత్ కి నాగ‌బాబు ఆఫ‌ర్ ఖాయంగానే క‌నిపిస్తోంది. కాబ‌ట్టి ఆయ‌నే ఈ యువ‌హీరోని మెగా కాంపౌండ్ లో ఎంక‌రేజ్ చేస్తారా? అన్న‌ది చూడాలి.