బాలీవుడ్‌ రాజమౌళిని కలిసిన అక్కినేని హీరో

అక్కినేని హీరో నాగ చైతన్య తాజాగా హిందీ సినిమా లాల్ సింగ్‌ చడ్డా లో నటించిన విషయం తెల్సిందే. వచ్చే వారంలో విడుదల అవ్వబోతున్న లాల్‌ సింగ్ చడ్డా సినిమా ప్రమోషన్‌ లో భాగంగా ముంబయి వెళ్లిన నాగ చైతన్య ఆశ్చర్యకరంగా బాలీవుడ్‌ స్టార్‌ ఫిల్మ్‌ మేకర్‌ సంజయ్ లీలా భన్సాలీ ని ఆయన ఆఫీస్ కు వెళ్లి మరీ కలవడం చర్చనీయాంశంగా మారింది.

ప్రస్తుతం ఒక సినిమా తో బిజీగా ఉన్న సంజయ్ లీలా భన్సాలీ స్వయంగా నాగ చైతన్యను పిలిపించుకుని మరీ మాట్లాడటంతో అసలు ఏం జరుగుతుంది అంటూ ఉత్తరాది మీడియాతో పాటు సౌత్ ఇండియన్ సినీ మీడియాలో ఆసక్తికర చర్చ జరుగుతోంది. హిందీలో నాగ చైతన్య సెకండ్‌ లీడ్‌ గా కంటిన్యూ చేసే అవకాశాలు ఉన్నాయని.. హీరోగా ఆఫర్‌ వచ్చినా హిందీ సినిమాను చేసేందుకు సిద్ధం అన్నట్లుగా చైతూ ఆ మధ్య అన్నాడు.

ఆ కారణంగానే సంజయ్ లీలా భన్సాలీ తాజాగా ఒక సినిమా నిమిత్తం నాగ చైతన్య తో మాట్లాడాడేమో అంటూ కొందరు ఊహించేస్తున్నారు. కారణం ఏంటీ.. అసలు ఇద్దరి మధ్య ఎలాంటి చర్చలు జరిగాయి అనే విషయంలో ఇప్పటి వరకు అధికారికంగా క్లారిటీ అయితే రాలేదు. కాని ఎవరికి తోచిన విధంగా వారు ఊహించేసుకుంటూ హైప్ క్రియేట్‌ చేస్తున్నారు.

బాలీవుడ్‌ లో రాజమౌళి వంటి దర్శకుడు అంటూ సంజయ్ లీలా భన్సాలీ కి పేరు ఉంది. భారీ సినిమాలను వరుసగా తీస్తూ ఉన్న సంజయ్ లీలా భన్సాలీ దర్శకత్వంలో కనుక నాగ చైతన్య నటించే అవకాశం దక్కించుకుంటే బాలీవుడ్‌ లో మరింత బిజీ అవ్వడం ఖాయం అంటూ ఇండస్ట్రీ వర్గాల వారు అభిప్రాయం వ్యక్తం చేస్తున్నారు.

ఇక నాగ చైతన్య సినిమాల విషయానికి వస్తే థాంక్యూ సినిమా తో ఇటీవలే ప్రేక్షకుల ముందుకు వచ్చిన ఈయన ఆశించిన స్థాయిలో సక్సెస్ లను దక్కించుకోవడంలో విఫలం అయ్యాడు. ఇప్పుడు లాల్‌ సింగ్‌ చడ్డా పై నమ్మకం పెట్టుకుని వెయిట్‌ చేస్తున్నాడు. మరో వైపు వెంకట్‌ ప్రభు దర్శకత్వంలో ఒక సినిమాను చేస్తున్నాడు.

అంతే కాకుండా థాంక్యూ దర్శకుడు విక్రమ్‌ కుమార్‌ దర్శకత్వంలో దూత అనే వెబ్‌ సిరీస్ ను కూడా చేస్తున్న విషయం తెల్సిందే. ఇదే సమయంలో ఆయన బాలీవుడ్‌ లో అడుగు పెట్టి మరింత బిజీ అయ్యేనా అనేది చూడాలి.