సవ్యసాచి జంట అదిరిందిగా!!

ఇటీవలే శైలజారెడ్డి అల్లుడుతో పలకరించిన నాగ చైతన్య కొత్త సినిమా సవ్యసాచి విడుదలకు రెడీ అవుతోంది. ఇటీవలే రిలీజ్ చేసిన టీజర్ కు అనూహ్య స్పందన దక్కడంతో టీమ్ రెట్టించిన ఉత్సాహంతో ఉంది. రిలీజ్ నవంబర్ లో ప్లాన్ చేసిన నేపథ్యంలో ప్రమోషన్ వేగం కూడా పెంచబోతున్నారు. అందులో భాగంగా మొదటి ఆడియో సింగల్ వై నాట్ ఈ నెల 9న ఉదయం 11 గంటలకు విడుదల చేయబోతున్నట్టు అధికారికంగా ప్రకటించారు. చైతుతో ఇందులో హిరోయిన్ గా నటిస్తున్న నిధి అగర్వాల్ కు ఇది డెబ్యూ మూవీ. దీని తర్వాతే అఖిల్ తో మిస్టర్ మజ్నులో కూడా ఛాన్స్ కొట్టేసింది.

చైతు పక్కన నిధిని చూస్తుంటే ఫ్రెష్ గా జంట బాగుంది అనే ఫీలింగ్ కలుగుతోంది. చైతు సినిమాకు మొదటిసారి అగ్ర సంగీత దర్శకులు కీరవాణి మ్యూజిక్ కంపోజ్ చేసారు. బాహుబలి తరువాత స్టార్ హీరోల సినిమాలకు కీరవాణి సంగీతం అందించడం సవ్యసాచితోనే. దీని తర్వాత ఎన్టీఆర్ మాత్రమే ఆయన ఒప్పుకున్నది.
వైనాట్ ఆడియో ట్రాక్ మీద ఫ్యాన్స్ కు మంచి అంచనాలు ఉన్నాయి. కీరవాణి నాగార్జున కాంబినేషన్ లో గతంలో చాలా మ్యూజికల్ హిట్స్ ఉన్నాయి. అల్లరి అల్లుడు-వారసుడు-ఘరానా బుల్లోడు-రక్షణ ఇవన్నీ మంచి పేరు తీసుకొచ్చి ఎవర్ గ్రీన్ ఆల్బమ్స్ గా మిగిలిపోయాయి.

అందుకే చైతుకు మొదటిసారి కంపోజ్ చేస్తున్న కీరవాణి ఈసారి కూడా బెస్ట్ ఇస్తాడన్న నమ్మకం వ్యక్తమవుతోంది.చందు మొండేటి దర్శకత్వం వహించిన ఈ యాక్షన్ థ్రిల్లర్ లో మాధవన్ భూమిక ఇతర కీలక పాత్రలు పోషించారు. ఒక చేయి ఆధీనంలో ఉండని వినూత్నమైన పాత్ర చేస్తున్న చైతుకి ఇది పెద్ద బ్రేక్ అవుతుందన్న నమ్మకం యూనిట్ తో పాటు అభిమానుల్లో కూడా ఉంది. విడుదల తేదీ మరోసారి ఖరారు కావాల్సి ఉంది.