బంగార్రాజు ను అనౌన్స్‌ చేయబోతున్న చైతూ?

నాగార్జున మన్మధుడు 2 చిత్రం సమయంలోనే 'బంగార్రాజు' చిత్రం మొదలైంది.. అదుగో షూటింగ్‌.. ఇదుగో మేకింగ్‌ అంటూ పుకార్లు షికార్లు చేశాయి. ఆ తర్వాత మన్మధుడు 2 చిత్రం విడుదలైన తర్వాత బంగార్రాజు చేస్తారంటూ వార్తలు వచ్చాయి. కాని మన్మధుడు 2 చిత్రం ఫలితం నేపథ్యంలో బంగార్రాజును పక్కకు పెట్టి వైల్డ్‌ డాగ్‌ అనే చిత్రాన్ని నాగార్జున చేస్తున్నాడు. ఇదే సమయంలో మళ్లీ బంగార్రాజు చిత్రం గురించి ప్రచారం మొదలైంది.

గత మూడు నాలుగు సంవత్సరాలుగా బంగార్రాజు గురించి వస్తున్న వార్తలకు ఫుల్‌ స్టాప్‌ పెట్టే సమయం వచ్చిందని అక్కినేని అభిమానులు అంటున్నారు. బంగార్రాజు చిత్రాన్ని వేసవిలో ప్రారంభించి వచ్చే సంక్రాంతికి ప్రేక్షకుల ముందుకు తీసుకు వచ్చేందుకు నాగార్జున రెడీ అవుతున్నాడు అంటూ అక్కినేని కుటుంబం కు అత్యంత సన్నిహితం గా ఉండే వారు చెబుతున్నారు. బంగార్రాజు చిత్రం స్క్రిప్ట్‌ చాలా నెలల క్రితమే సిద్దం అయ్యింది. దర్శకుడు కళ్యాణ్‌ కృష్ణ నాగ్‌ గ్రీన్‌ సిగ్నల్‌ కోసం ఎదురు చూస్తున్నాడు.

నాగ్‌ ప్రస్తుతం చేస్తున్న సినిమా షూటింగ్‌ పూర్తి అయిన వెంటనే బంగార్రాజు చిత్రంను మొదలు పెట్టబోతున్నాడట. ఈ విషయాన్ని అక్కినేని నాగచైతన్య త్వరలో ప్రకటించబోతున్నాడట. బంగార్రాజు చిత్రంలో నాగచైతన్య కూడా కనిపించబోతున్నాడట. నాగార్జున మరియు నాగచైతన్య ల కాంబో సీన్స్‌ చాలా ఆసక్తికరంగా ఉంటాయని కూడా అంటున్నారు. బంగార్రాజు చిత్రాన్ని నాగచైతన్యతో అనౌన్స్‌ చేయించడం వల్ల ప్రేక్షకుల్లో ఆసక్తి మరింతగా పెంచాలని యూనిట్‌ సభ్యులు భావిస్తున్నారు. అయితే చైతూ బంగార్రాజు ను అనౌన్స్‌ చేసేది ఎప్పుడు మాత్రం క్లారిటీ రావడం లేదు.