ప్రేమమ్.. సాహసం.. క్లారిటీ ఇచ్చేసిన చైతూ

ఓ పక్క ‘ప్రేమమ్’ నిర్మాతలు తమ సినిమాను సెప్టెంబరు 9న రిలీజ్ చేస్తున్నట్లు ఇలా ప్రకటించారో లేదో.. అటు గౌతమ్ మీనన్ కూడా తన ‘సాహసం శ్వాసగా సాగిపో’ను అదే రోజు విడుదల చేయబోతున్నట్లు ట్వీట్ చేసి నాగచైతన్య అభిమానులకు పెద్ద షాకే ఇచ్చాడు. దీంతో బాలయ్య బంగారు బుల్లోడు.. నిప్పురవ్వ సినిమాలు ఒకే రోజు రిలీజైనట్లు చైతూ చిత్రాలు కూడా రెండు ఒకే రోజు ప్రేక్షకుల ముందుకొస్తాయా అంటూ పెద్ద చర్చే నడిచింది టాలీవుడ్లో. ఐతే ఈ పోటీ విషయంలో ఫ్రస్టేట్ అయిన చైతూ.. ఇద్దరు నిర్మాతలతోనూ మాట్లాడి విషయం సెటిల్ చేసేసినట్లు తెలుస్తోంది. ప్రేమమ్ సినిమానే ముందు రిలీజ్ చేసేలా.. ఆ తర్వాతే ‘సాహసం..’ వచ్చేలా ఇద్దరికీ అంగీకారం కుదిరినట్లు స్పష్టమవుతోంది.

తన రెండు సినిమాల రిలీజ్ గురించి స్వయంగా చైతూనే క్లారిటీ ఇచ్చాడు. సెప్టెంబర్ 9న ‘ప్రేమమ్’ను విడుదల చేసి.. కొన్ని వారాల తర్వాత ‘సాహసం శ్వాసగా సాగిపో’ను ప్రేక్షకుల ముందుకు తీసుకురావాలని అనుకుంటున్నట్లు చైతూ చెప్పాడు. ‘ప్రేమమ్’ కంటే ముందే ‘సాహసం శ్వాసగా సాగిపో’ చిత్రీకరణ పూర్తిచేసినా.. అనేక కారణాల వల్ల విడుదల ఆలస్యమైందని చైతూ అన్నాడు. సినిమా నిర్మాణంలో ఏం జరుగుతుందో ఊహించడం కష్టమని చెప్పాడు. మేకింగ్ ఎలా జరిగినా.. ఒక హీరో రెండు సినిమాల విడుదల మధ్య కొంత గ్యాప్ ఉండేలా చూసుకోవడం ముఖ్యం అని అభిప్రాయపడ్డాడు. కాబట్టి ‘ప్రేమమ్’ ముందు.. ఆ తర్వాత ‘సాహసం..’ వస్తుందన్నమాట. రెంటికీ మధ్య గ్యాప్ మరీ ఎక్కువ ఉండకపోవచ్చని.. సెప్టెంబర్లోనే ‘సాహసం..’ కూడా విడుదల కావచ్చని సమాచారం.