చైతూ-త్రివిక్రమ్ కాంబినేషన్ పక్కా

త్రివిక్రమ్ తో పని చేయాలని ఆశపడని తెలుగు హీరో ఎవరుంటారు చెప్పండి. ఐతే ఆయన మాత్రం తనకు కంఫర్టబుల్ గా అనిపించే మహేష్ - పవన్ కళ్యాణ్ లాంటి వాళ్లలో మళ్లీ మళ్లీ సినిమాలు తీయడానికి ఇష్టపడుతుంటాడు. అల్లు అర్జున్ తో కూడా కాంబినేషన్ రిపీట్ చేశాడు. ఈ ముగ్గురు హీరోలతోనే దశాబ్దం గడిపిన త్రివిక్రమ్.. ఇప్పుడే వాళ్లను వదిలేసి నితిన్ తో సినిమా చేస్తున్నాడు. ఐతే నితిన్ కంటే ముందు నాగచైతన్యతో ఆయన పని చేయాల్సింది. అసలు ‘అ.. ఆ’ సినిమాకు ముందు అనుకున్నది కూడా చైతూనే. కానీ ఎందుకో అతడు పక్కకెళ్లిపోయాడు. నితిన్ వచ్చాడు.

ఐతే ‘అ.. ఆ’ తర్వాత మాత్రం చైతూ-త్రివిక్రమ్ కాంబినేషన్ కచ్చితంగా ఉంటుందని సమాచారం. త్రివిక్రమ్ కు అత్యంత సన్నిహితుడైన నిర్మాత రాధాకృష్ణ ‘అ.. ఆ’ సినిమా చేస్తూనే.. చైతూతో ప్రేమమ్ రీమేక్ ‘మజ్ను’ మొదలుపెట్టబోతున్నాడు. ఆయనే వీళ్లిద్దరి కాంబినేషన్ కు రంగం సిద్ధం చేశాడు. రాధాకృష్ణను నిర్మాతగా పరిచయం చేసిన ఆయన బంధువు డీవీవీ దానయ్యే ఈ సినిమాకు నిర్మాత. ప్రస్తుతం గౌతమ్ మీనన్ తో ‘సాహసం శ్వాసగా సాగిపో’ చేస్తున్న చైతూ.. త్వరలోనే ‘మజ్ను’ షూటింగులో పాల్గొంటాడు. దాని తర్వాత త్రివిక్రమ్ తో సినిమా చేసే అవకాశముంది. త్రివిక్రమ్.. రామ్ చరణ్ తో కూడా ఓ సినిమా చేయాల్సి ఉన్నా.. చైతూ మూవీ పూర్తయ్యాకే అది మొదలుపెడతాడట.