అన్నపూర్ణ వాళ్లే ఆ సినిమాను కొన్నారట

అక్కినేని నాగార్జున మేనల్లుడు సుశాంత్ మొదట్నుంచి సొంత బేనర్ ‘శ్రీ నాగ్ కార్పొరేషన్’లోనే సినిమాలు చేశాడు. అవేవీ అతడికి ఆశించిన ఫలితాన్నివ్వలేదు. ఐతే తొలిసారి అతను బయటి బేనర్లో చేసిన ‘చి ల సౌ’ మంచి క్రేజ్ సంపాదించుకుంది. ఈ చిత్ర టీజర్ ఆకట్టుకుంది. పైగా ఈ సినిమాను అన్నపూర్ణ స్టూడియోస్ తమ చేతుల్లోకి తీసుకుని.. సొంతంగా రిలీజ్ చేయడానికి ముందుకు రావడం విశేషం. ఐతే మేనల్లుడి కోసం నాగ్ చేసిన సాయం ఇదని.. సుశాంత్ రిక్వెస్ట్ మేరకే నాగ్ ఈ ఫేవర్ చేసి ఉంటాడని అంతా అనుకున్నారు. కానీ అలాంటిదేమీ లేదని అంటున్నాడు నాగ్ పెద్ద కొడుకు నాగచైతన్య. తమకే ఈ సినిమా నచ్చి ఆ చిత్ర బృందాన్ని అప్రోచ్ అయ్యామమని అతను చెప్పాడు.

‘చి ల సౌ’తో దర్శకుడిగా పరిచయం కాబోతున్న రాహుల్ రవీంద్రన్ తనకు ఒక కథ చెప్పాడని.. అది నచ్చి ఆ తర్వాత ‘చి ల సౌ’ సినిమా చూశానని చైతూ వెల్లడించాడు. ఈ కథ చాలా కొత్తగా ఉంటుందని.. సినిమా కూడా చాలా వినోదాత్మకంగా సాగిపోతుందని.. అసలు పరిచయం లేని ఇద్దరు వ్యక్తులు ఒక్క రోజు వ్యవధిలో ఎలా పెళ్లి చేసుకున్నారన్నదే ఈ కథ అని.. 24 గంటల వ్యవధిలో కథ ముగిసిపోతుందని చెప్పాడు చైతూ. తక్కువ బడ్జెట్లో కేవలం 32 రోజుల్లోనే ఈ సినిమాను పూర్తి చేశారని తెలిసి తాను ఆశ్చర్యపోయినట్లు చైతూ చెప్పాడు. హీరో సుశాంత్ చాలా బాగా చేశాడని.. ఇలాంటి సినిమా ఒప్పుకోవడం ద్వారా తన అభిరుచిని చాటుకున్నాడని అన్నాడు. ఇన్నాళ్లూ నిర్మాణం జోలికి వెళ్లని చైతూ.. ‘చి ల సౌ’ విషయంలో అన్నీ తానై నడిపించబోతున్నట్లు సమాచారం. ఈ చిత్రం జులై 27న ప్రేక్షకుల ముందుకు రానుంది. దీని తర్వాత రాహుల్ దర్శకత్వంలో చైతూ నటించే అవకాశాలున్నాయి.