మ‌హేష్ డైరెక్ట‌ర్ - చై సినిమాకు లైన్ క్లియ‌ర్‌

ఒక హీరో కోసం మ‌రో హీరోని ప‌క్క‌న పెట్ట‌డం అన్న‌ది చాలా సంద‌ర్భాల్లో జ‌రుగుతూ వ‌స్తోంది. అయితే కెరీర్ ప్రారంభంలో స్టార్ హీరోతో పాటు యంగ్ హీరోని కూడా ఒకేసారి ఒప్పించిన ద‌ర్శ‌కుడు ఆ ఇద్ద‌రిలో ఎవ‌రితో సినిమా చేయాలా అని త‌ర్జ‌న‌భ‌ర్జ‌న ప‌డి చివ‌రికి స్టార్ హీరోకే జై కొట్టేశాడు. దీంతో యంగ్ హీరో ప‌క్క‌కు త‌ప్పుకోవాల్సి వ‌చ్చింది. తాజాగా త‌ను అంగీకిరంచిన స్టార్ మూవీని పూర్తి చేసిన ద‌ర్శ‌కుడు మ‌ళ్లీ త‌న కోసం ఎదురుచూస్తున్న హీరో తో క‌లిసి సినిమాకు రెడీ అయిపోతున్నాడు.

వివ‌రాల్లోకి వెళితే.. రౌడీ స్టార్ విజ‌య్ దేవ‌ర‌కొండ హీరోగా తెర‌కెక్కిన‌ `గీత గోవిందం` చిత్రంతో తొలి బ్లాక్ బ‌స్ట‌ర్ హిట్ ని త‌న ఖాతాలో వేసుకున్నాడు యంగ్ డైరెక్ట‌ర్ ప‌ర‌శురామ్‌. ఈ సినిమా కార‌ణంగా ఇండ‌స్ట్రీలో వున్న స్టార్ హీరోల దృష్టిని ఆక‌ర్షించాడు. ఇదే స‌మ‌యంలో క్రేజీ హీరో నాగ‌చైత‌న్య‌తో సినిమాకు రెడీ అయిపోయాడు. స్క్రిప్ట్ కూడా ఫైన‌ల్ అయింది. భారీ నిర్మాణ సంస్థ కూడా ఈ ప్రాజెక్ట్ కు గ్రీన్ సిగ్న‌ల్ ఇచ్చేసింది. త్వ‌ర‌లోనే మూవీని సెట్స్ పైకి తీసుకెళ్లాల‌ని ప్లాన్ కూడా చేశారు. క‌ట్ చేస్తే.. స్టార్ హీరో నుంచి ప‌ర‌శురామ్ కు పిలుపొచ్చింది.

అదే సూప‌ర్ స్టార్ మ‌హేష్ నుంచి పిలుపు రావ‌డంతో ప‌ర‌శురామ్ కు ఏం చేయాలో అర్థం కాలేదు. మ‌హేష్ త‌న ఫేవ‌రేట్ హీరో. ఆయ‌న‌తో ఎప్ప‌టికైనా సినిమా చేయాల‌న్న‌ది ప‌ర‌శురామ్ డ్రీమ్‌. అదే వెతుక్కుంటూ రావ‌డంతో వెంట‌నే వెళ్లి మహేష్ కు క‌థ వినిపించారు. క‌థ న‌చ్చ‌డంతో వెంట‌నే మ‌హేష్ గ్రీన్ సిగ్న‌ల్ ఇచ్చేశాడు. దీంతో నాగ‌చైత‌న్య ప్రాజెక్ట్ ప‌క్క‌కు వెళ్లి మ‌హేష్ ప్రాజెక్ట్ ప‌ట్టాలెక్కింది. అయితే చై సినిమా ప‌రిస్థితి ఏంటి?.. త‌న సినిమా ప‌క్క‌న పెడితే వింటాడా? అని ప‌ర‌శురామ్ ఆలోచ‌న‌లో ప‌డ్డార‌ట‌.

అయితే చైతో సినిమాని ప్లాన్ చేసిన 14 రీల్స్ ప్ల‌స్ సంస్థ కూడా మ‌హేష్ సినిమాకు భాగ‌స్వామిగా వ్య‌వ‌హ‌రించ‌డంతో ప‌ర‌శురామ్ ప‌ని సులువు అయింద‌ని, చై అంగీక‌రించ‌డం వ‌ల్లే త‌ను మ‌హేష్ తో `స‌ర్కారు వారి పాట‌` చేశాడ‌ని చెబుతున్నారు. ఈ మూవీ మే 12న విడుద‌ల కానున్న నేప‌థ్యంలో మ‌ళ్లీ నాగ‌చైత‌న్య - ప‌ర‌శురామ్ ల ప్రాజెక్ట్ తెర‌పై కొచ్చింది. ఎలాగూ మ‌హేష్ ప్రాజెక్ట్ పూర్త‌యి రిలీజ్ అవుతోంది కాబ‌ట్టి నాగ‌చైత‌న్య‌తో ప‌ర‌శురామ్ ప్రాజెక్ట్ కి లైన్ క్లియ‌ర్ అయింద‌ని చెబుతున్నారు.

ఈ చిత్రాన్ని 14 ప్ల‌స్ రీల్స్ సంస్థ నిర్మించ‌నుంద‌ని, గ‌తంలో ఓకే చేసిన ప్రాజెక్ట్ కావ‌డంతో ఇదే చిత్రాన్ని త్వ‌ర‌లో ప‌ట్టాలెక్కిస్తార‌ని వార్త‌లు వినిపిస్తున్నాయి. ప్ర‌స్తుతం నాగ‌చైత‌న్య వ‌రుస చిత్రాల్లో న‌టిస్తూ బిజీగా వున్నారు. విక్ర‌మ్ కె. కుమార్ డైరెక్ట్ చేస్తున్న `థాంక్యూ` మూవీని పూర్తి చేసిన చై ఇటీవ‌లే ఇదే డైరెక్ట‌ర్ తో `అమెజాన్ ప్రైమ్ కోసం `దూత‌` అనే వెబ్ సిరీస్ ని మొద‌లు పెట్టాడు. ప్ర‌స్తుతం ఇది చిత్రీక‌ర‌ణ ద‌శ‌లో వుంది. అలాగే త‌మిళ ద‌ర్శ‌కుడు వెంక‌ట్ ప్ర‌భుతో ఓ బైలింగ్వ‌ల్ సినిమా కు గ్రీన్ సిగ్న‌ల్ ఇచ్చాడు. ఇది సెట్స్ పైకి రావాల్సి వుంది.