ప్రేమమ్ ఆగస్టు 12న పక్కా

ఈ ఏడాది సంక్రాంతికి నందమూరి బాలకృష్ణ-జూనియర్ ఎన్టీఆర్ పోటీకి దిగుతారంటే చాలామంది నమ్మలేదు. అలాగే నాన్నకు ప్రేమతో-సోగ్గాడే చిన్నినాయనా-డిక్టేటర్ లాంటి భారీ సినిమాలు లైన్లో ఉండగా.. ‘ఎక్స్ ప్రెస్ రాజా’ లాంటి మీడియా రేంజి సినిమా వాటితో పోటీ పడుతుందన్నా చాలామంది నమ్మడానికి ఇష్టపడలేదు. కానీ చివరికి బాలయ్య-ఎన్టీఆర్ తలపడ్డారు.. ఎక్స్ ప్రెస్ రాజా కూడా రేసులో నిలిచింది. అంత పోటీలో కూడా సంక్రాంతి సినిమాల్లో మూడు సినిమాలు బాగా ఆడాయి. ఒకటి పర్వాలేదనిపిచకుంది. కంటెంట్ ఉన్న సినిమాలు రావాలి కానీ.. ఒకే రోజు రెండు పెద్ద సినిమాలు రిలీజైనా ఇబ్బందేమీ ఉండదనడానికి ఇది రుజువు. ఆగస్టు 12న ‘జనతా గ్యారేజ్’తో ‘ప్రేమమ్’ పోటీ పడే విషయంలోనూ జనాలకు ఏవైనా సందేహాలుంటే తొలగించుకోవాల్సిందే అని స్పష్టమవుతోంది.

ఆగస్టు 12న ‘ప్రేమమ్’ విడుదల కావడం పక్కా అంటున్నారు ప్రేమమ్ టీమ్ . ఇప్పటికే షూటింగ్ పూర్తి చేసి.. పోస్ట్ ప్రొడక్షన్ కార్యక్రమాలు చకచకా పూర్తి చేస్తున్నామని.. ఆగస్టు 12నే ఈ చిత్రాన్ని విడుదల చేయాలనుకుంటున్నామని చందూ తెలిపారు. ఒకవేళ రజినీకాంత్ సినిమా ‘కబాలి’ జులైలో విడుదల కాకుండా వెనక్కి వెళ్తే తప్ప ‘ప్రేమమ్’ అనుకున్న ప్రకారమే ఆగస్టు 12న వచ్చేస్తుందన్నది ఆ చిత్ర వర్గాల సమాచారం. ‘జనతా గ్యారేజ్’ భారీ అంచనాల మధ్య విడుదలవుతున్నప్పటికీ ‘ప్రేమమ్’ను దానికి పోటీగా రిలీజ్ చేయడానికి వెనుకాడట్లేదంటేనే ఈ సినిమా మీద దర్శక నిర్మాతలకు ఉన్న కాన్ఫిడెన్స్ ఏంటో అర్థమవుతుంది. మలయాళ వెర్షన్‌ కు ఏమాత్రం తగ్గని స్థాయిలో తెలుగు ‘ప్రేమమ్’ను తీర్చిదిద్దాడట చందూ. హీరో చైతూ.. నిర్మాత సూర్యదేవర నాగవంశీ సినిమా ఔట్ పుట్ విషయంలో చాలా సంతృప్తిగా ఉన్నారట. ‘ప్రేమమ్’ తెలుగులోనూ మ్యాజిక్ క్రియేట్ చేయడం ఖాయమని యూనిట్ వర్గాలు కాన్ఫిడెంట్ గా ఉన్నాయి. ఈ సినిమా విడుదల విషయంలో మున్ముందేమైనా ట్విస్టులుంటాయేమో కానీ.. ప్రస్తుతానికైతే ఆగస్టు 12న ఎన్టీఆర్-చైతూ బిగ్ ఫైట్ పక్కా అని ఫిక్సవచ్చన్నమాట.