చైతూ క్యామియోలు అదిరిపోతున్నాయ్ కానీ..

‘ప్రేమమ్’ సినిమాతో మాంచి క్రేజ్ తెచ్చుకున్నాడు అక్కినేని నాగచైతన్య. ఈ మధ్య అతను తన ఫ్యామిలీ హీరోల కోసం క్యామియో రోల్స్ కూడా చేస్తున్నాడు. రెండు నెలల కిందట విడుదలైన నాగార్జున మేనల్లుడు సుశాంత్ సినిమా ‘ఆటాడుకుందాం రా’లో చైతూ ఒక క్యామియో చేశాడు. అందులో చైతూ.. చైతూగానే కనిపించాడు. సినిమాలో బకరా అయిపోయిన బ్రహ్మి వచ్చి అన్నపూర్ణ స్టూడియో నాదంటాడు. చైతూ బ్రహ్మికి ఒకటి తగిలించి పంపిస్తాడు. ఆ క్యామియో రోల్ లో చైతూ అదరగొట్టాడు. కానీ సినిమాలో విషయం లేకపోవడంతో ఆ క్యామియో వృథా అయిపోయింది.

ఇక తాజాగా చైతూ నాగార్జున మరో మేనల్లుడు సుమంత్ కోసం సాయం పట్టాడు. సుమంత్ కొత్త సినిమా ‘నరుడా డోనరుడా’లో కొసమెరుపులా ప్రత్యక్షమవుతాడు చైతూ. ఈ సినిమాలో సుమంత్ స్పెర్మ్ డోనర్ పాత్ర పోషించిన సంగతి తెలిసిందే. హీరో పెళ్లి చేసుకుని ఆ పనికి గుడ్ బై చెప్పేయడంతో మరో డోనర్ అవసరమవుతాడు డాక్టర్ భరణికి. అప్పుడు అతడి కళ్లు ఓ కుర్రాడి మీద పడతాయి. ఆ కుర్రాడే చైతూ అన్నమాట. ఈ పాత్రలో చైతూ భలే స్టైలిష్ గా.. ట్రెండీగా కనిపించాడు. టీనేజీ కుర్రాడిలాగా దర్శనమిచ్చాడు. ఆ పాత్రలో అతను చూపించిన యాటిట్యూడ్ కూడా ఆకట్టుకుంటుంది. కాకపోతే ఈ క్యామియో కూడా సినిమాకు ఏమాత్రం కలిసొస్తుందన్నదే డౌటు. ఎందుకంటే ‘నరుడా డోనరుడా’ అంచనాల్ని అందుకోవడంలో విఫలమైంది. తక్కువ బడ్జెట్లో పూర్తవడం వల్ల పెట్టుబడి అయితే వెనక్కి వచ్చేయొచ్చు కానీ.. సుమంత్ కెరీర్ కు ఈ సినిమా ఏమాత్రం ఉపయోగపడుతుందన్నది మాత్రం డౌటే.

Like Us on Facebook : https://www.facebook.com/Tupakidotcom/