సవ్యసాచి.. గ్రాఫిక్ వర్క్ బలంగానే

‘ప్రేమమ్’ లాంటి సూపర్ హిట్ మూవీ అందించిన అక్కినేని నాగచైతన్య-చందూ మొండేటి కాంబినేషన్లో ‘సవ్యసాచి’ సినిమా తెరకెక్కుతున్న సంగతి తెలిసిందే. తన తొలి సినిమా ‘కార్తికేయ’ తరహాలోనే ఓ వైవిధ్యమైన కథాంశంతో ఈ చిత్రాన్ని రూపొందిస్తున్నాడు చందూ మొండేటి. ముందు అనుకున్న ప్రకారమైతే ఈ చిత్రం ఇప్పటికే విడుదలకు సిద్ధం కావాల్సింది. ఐతే ఈ చిత్రంలో గ్రాఫిక్స్.. విజువల్ ఎఫెక్ట్స్ కు చాలా ప్రాధాన్యం ఉండటంతో దానికి సంబంధించిన వర్క్ ఆలస్యమైంది. క్వాలిటీ విషయంలో రాజీ పడకపోవడంతో జూన్ రిలీజ్ డేట్ అందుకోలేకపోయారు. జులై నెలాఖర్లో లేదా ఆగస్టు ప్రథమార్ధంలో ఈ చిత్రం ప్రేక్షకుల ముందుకొస్తుందని అంటున్నారు.

‘సవ్యసాచి’ షూటింగ్ ఇప్పటికే పూర్తి కాక.. ప్రస్తుతం గ్రాఫిక్స్ వీఎఫ్ఎక్స్ పనులు ముమ్మరంగా జరుగుతున్నాయి. ‘ఈగ’.. ‘బాహుబలి’ లాంటి సినిమాలకు ఎఫెక్ట్స్ సమకూర్చిన మకుట సంస్థ ఈ చిత్రానికి పని చేస్తుండటం విశేషం. చిత్ర నిర్మాణ సంస్థ మైత్రీ మూవీ మేకర్స్ ఇందుకోసం భారీగానే ఖర్చు చేస్తున్నట్లు సమాచారం. ఈ చిత్రంలో హీరో నాగచైతన్యకు తన చెయ్యే సమస్య తెచ్చి పెడుతుంటుంది. ఒక చేయి అతడి మాట వినదు. దాన్ని విలన్ నియంత్రిస్తుంటాడు. వినడానికి చాలా ఎగ్జైటింగ్ గా అనిపించే కాన్సెప్ట్ ఇది. ఈ వైవిధ్యమైన కథాంశమే తమిళ నటుడు మాధవన్ తొలిసారిగా ఓ తెలుగు సినిమాలో నటించడానికి ఒప్పుకునేలా చేసింది. ‘సవ్యసాచి’లో చైతూ సరసన బాలీవుడ్ భామ నిధి అగర్వాల్ కథానాయికగా నటిస్తోంది. ఎం.ఎం.కీరవాణి సంగీతాన్నందిస్తున్నాడు.