స్టీల్ ఫ్యాక్టరీలో కొట్టుకుంటున్న సవ్యసాచి

అక్కినేని నాగ చైతన్య లేటెస్ట్ మూవీ సవ్యసాచి.. ఫుల్ పేస్ లో షూటింగ్ జరుపుకుంటోంది. రీసెంట్ గా తన భార్యతో కలిసి అమెరికా ట్రిప్ వేసొచ్చిన చైతు.. ఇప్పుడు సవ్యసాచి షూటింగ్ కు రెగ్యులర్ గా వచ్చేస్తున్నాడు. జూన్ నెలలో రిలీజ్ టార్గెట్ పెట్టుకోవడంతో.. ఈ లక్ష్యాన్ని అందుకునేందుకు చకచకా పనులు ఫినిష్ చేస్తున్నాడు.

సవ్యసాచి అంటే నిజానికి అర్జునుడు అనే సంగతి తెలిసిందే. రెండు చేతులతోను గురి చూసి బాణం వేయగల దిట్ట కాబట్టే.. ఆయనకు ఆ పేరు వచ్చింది. అలాగే.. ఈ సినిమా టైటిల్ ప్రకారం.. చైతు పాత్రకు కూడా ఇలాగే రెండు చేతులను చాలా ఎఫెక్టివ్ గా ఉపయోగించగల కెపాసిటీ ఉంటుందట. ఈ కాన్సెప్ట్ ఆధారంగా ఓ ఫైట్ సీన్ ను డిజైన్ చేశారట. తూప్రాన్ లో ఉన్న స్టీల్ ఫ్యాక్టరీలో తన రెండు చేతులను ఓ పద్ధతి ప్రకారం ఉపయోగించి రౌడీలను ఇరగదీసే ఫైట్ సీక్వెన్స్ షూటింగ్ చేస్తున్నారు. ఈ ఫైట్ తో పాటు సినిమాలోని అన్ని యాక్షన్ సీక్వెన్స్ లను రామ్ లక్ష్మణ్ లు కంపోజ్ చేస్తున్నారు. అయితే.. ప్రస్తుతం తెరకెక్కిస్తున్న యాక్షన్ సీక్వెన్స్ మాత్రం సినిమాకు మేజర్ హైలైట్ అవుతుందనే టాక్ ఉంది.

చందూ మొండేటి దర్శకత్వంలో థ్రిల్లర్ జోనర్ లో సవ్యసాచి రూపొందుతోంది. మాధవన్.. భూమిక వంటి సీనియర్ స్టార్లు ఈ మూవీకి ప్రత్యేక ఆకర్షణగా నిలవనుండగా.. బాలీవుడ్ భామ నిధి అగర్వాల్ హీరోయిన్ గా నటిస్తోంది. ఎంఎం కీరవాణి అందించే సంగీతం ఆకట్టుకోనుంది. జూన్ 14న సవ్యసాచిని థియేటర్లలోకి తెచ్చే ప్రయత్నాలు జరుగుతున్నాయి.