తరుణ్ కు ‘ఎస్’ చెప్పని చైతూ..

అక్కినేని నాట వారసత్వానికి కొనసాగింపుగా ఇండస్ట్రీలోకి అడుగు పెట్టాడు నాగచైతన్య. ‘జోష్’మూవీతో భారీ ఎక్స్పెక్టేషన్స్ తో తెరంగేట్రం చేసిన చైతూ.. తనదైన మార్కు నమోదు చేసేందుకు ప్రయత్నిస్తూనే ఉన్నాడు. లవర్ బాయ్ నుంచి మాస్ మసాలా వరకూ అన్ని జోనర్ లనూ టచ్ చేశాడీ అక్కినేని వారసుడు.. చెప్పుకోదగ్గ హిట్ కోసం కసిగా సినిమాలు చేస్తున్నాడు.

కాగా.. చైతూతో కలిసి యంగ్ డైరెక్టర్ తరుణ్ భాస్కర్ ఓ సినిమా చేయడానికి చర్చలు జరుపుతున్నట్లు గతంలో వార్తలు వచ్చాయి. ఈ విషయాన్ని తరుణ్ పరోక్షంగా మీడియాలో కూడా వెల్లడించాడు. తన తొలి చిత్రం ‘పెళ్లి చూపులు’తో ఇండస్ట్రీ దృష్టిని తనవైపు తిప్పుకున్నాడు డైరెక్టర్ తరుణ్ భాస్కర్. వీరిద్దరి కాంబినేషన్ లో సినిమా అనగానే అక్కినేని అభిమానులు చాలా ఆనందించారు.

అయితే.. చైతూ క్యాంప్ నుండి వచ్చిన లేటెస్ట్ అప్‌డేట్ ఏమిటంటే.. తరుణ్ భాస్కర్ కి ఇంకా పచ్చజెండా ఊపలేదట ఈ హీరో. దర్శకుడు చెప్పిన సింగిల్ లైన్ నచ్చిందన్న జూనియర్ నాగ్.. స్క్రిప్టు మొత్తం డీటెయిల్ గా కావాలని అడిగాడట. దీనికోసమే చైతూ వెయిట్ చేస్తున్నట్టు సమాచారం. స్క్రిప్టు నచ్చి, అక్కినేని వారసుడు ఓకే చెబితే.. ఈ ప్రాజెక్ట్ 2021 చివరి భాగంలో సెట్స్ పైకి వెళ్తుందట.

ప్రస్తుతం చైతూ శేఖర్ కమ్ముల దర్శకత్వంలో ‘లవ్ స్టోరీ’ సినిమా చేస్తున్నాడు. ఇందులో హీరోయిన్ గా సాయిపల్లవి నటిస్తోంది. ‘ఫిదా’ వంటి బ్లాక్ బస్టర్ సక్సెస్ తర్వాత శేఖర్ కమ్ముల, సాయి పల్లవితో నాగచైతన్య సినిమా చేస్తుండడంతో ఈ చిత్రం భారీ అంచనాలు నెలకొన్నాయి. సెన్సిబుల్ అండ్ లవబుల్ సినిమాలకు పెట్టింది పేరైనా శేఖర్ కమ్ముల ఈ సినిమానను ఏ రేంజ్ లో తెరకెక్కిస్తున్నారో అని అక్కినేని అభిమానులు ఎదురు చూస్తున్నారు. దీంతోపాటు విక్రమ్ కుమార్ దర్శకత్వం వహిస్తున్న ‘థాంక్యూ’ అనే చిత్రంలోనూ నటిస్తున్నాడు చైతూ.