అమ్మ గురించి చైతూ మాట్లాడాడు

నాగచైతన్య అనగానే అందరికీ అతడి తండ్రి నాగార్జున గుర్తొస్తాడు కానీ.. తల్లి లక్ష్మి తలపుల్లోకి రాదు. రామానాయుడి కూతురైన లక్ష్మి చైతూకు తల్లి అన్న సంగతి తెలిసిందే. చైతూకి టీనేజ్ వచ్చే వరకు రామానాయుడి ఇంట్లోనే పెరిగారు. తల్లి వాత్సల్యాన్ని పొందాడు. ఆ తర్వాత తండ్రి దగ్గరికి వచ్చాడు. ఆయన గైడెన్స్ లో పెరిగాడు. ఈ రోజు మదర్స్ డే సందర్భంగా తన తల్లి గురించి.. ఆమెతో అనుబంధం గురించి మాట్లాడాడు చైతూ. అతనేమన్నాడో చూద్దాం పదండి.

‘‘నేను-అమ్మ.. 18 ఏళ్ల వరకు నాకు తెలిసిన ప్రపంచం మేమిద్దరమే. నన్ను కోప్పడాలన్నా.. ప్రేమించాలన్నా.. నాతో ఆడుకోవాలన్నా.. అన్నిటికీ అమ్మే తోడు. క్రికెట్.. మ్యూజిక్.. ఫొటోగ్రఫీ.. రేసింగ్.. ఏది ఇష్టమంటే అది నేర్పించింది. ఏదైనా కావాలని అడిగితే.. ముందు ఈ పరీక్ష పాసవ్వు.. తెచ్చిపెడతా.. అనేది. ఊరికే వచ్చిందేదీ సంతోషాన్నివ్వదని చెప్పడమే అమ్మ ఉద్దేశం. సినిమా ఫ్యామిలీ నుంచి వచ్చింది కాబట్టి ఆ రంగంలో ఎత్తుపల్లాలు ఆమెకు తెలుసు. అందుకే డిగ్రీ పూర్తయ్యేకే సినిమాలని కచ్చితంగా చెప్పింది. ఓ స్నేహితురాలిగా.. గురువుగా.. గైడ్ లాగా నా వ్యక్తిత్వాన్ని తీర్చిదిద్దింది అమ్మే’’ అన్నాడు చైతూ.

మరోవైపు జూనియర్ ఎన్టీఆర్ సైతం తన తల్లి షాలిని గురించి స్పందించాడు. ‘‘చాలామంది తల్లులు తెలియని భయాలతో పిల్లల్ని బయటికి పంపరు. కానీ మా అమ్మ మాత్రం ఏ విషయమైనా సొంతంగా నేర్చుకోమని బయటికి పంపేది. ఒంటరిగానే ఎక్కడికైనా వెళ్లమనేది. తన వల్లే కూచిపూడి నేర్చుకున్నా. ఊహ తెలిసినప్పటి నుంచి తన కష్టాల్ని ఆమె నా దగ్గర ఎప్పుడూ దాచిపెట్టలేదు. కోపమొస్తే కొట్టడం.. తర్వాత ఆ దెబ్బలకు మందు రాస్తూ కన్నీరు కార్చడం.. అమ్మతో నా చిన్ననాటి జ్నాపకాల్ని తలచుకుంటే ముందే ఇవే గుర్తుకొస్తాయి’’ అని చెప్పాడు తారక్.