హెచ్చ‌రిక‌.. హెచ్చ‌రిక‌.. నాగౌశ‌ర్య హెచ్చ‌రిక‌!

కెరీర్ ఆరంభం నుంచీ సాఫ్ట్ లుక్ తో మీడియం రేంజ్ సినిమాలు చేస్తూ వ‌చ్చిన నాగశౌర్య.. రూట్ మారుస్తున్నాడు. త‌న‌లోని మాస్ యాంగిల్ ను ఎలివేట్ చేస్తున్నాడు. ప్రస్తుతం శౌర్య హీరోగా తెర‌కెక్కుతోన్న చిత్రం 'లక్ష్య'. సంతోష్‌ జాగర్లపూడి దర్శకత్వం వహిస్తున్న ఈ మూవీ.. ప్రాచీన విలువిద్య నేపథ్యంలో రూపొందుతోంది. ఈ చిత్రం షూటింగ్ చివ‌రి ద‌శ‌లో ఉంది. దీనికి సంబంధించిన పోస్టర్ ను ఇటీవల రిలీజ్ చేశారు. 'ది గేమ్ విల్ నెవర్ బీ ద సేమ్' అంటూ ఎయిట్‌ ప్యాక్ బాడీతో చేతిలో బాణం పట్టుకుని, వారియర్ పోజ్ లో నాగశౌర్య ఉన్న లుక్‌ మైండ్ బ్లోయింగ్ అనిపించింది.

అయితే.. తన రూట్ మార్చ‌డమే కాకుండా.. సినిమాల విష‌యంలోనూ జోరు పెంచాడు శౌర్య. ఓవైపు ల‌క్ష్య చేస్తూనే.. మ‌రోవైపు 'వరుడు కావలెను' సినిమా కూడా చేస్తున్నాడు. ఈ రెండు సెట్ల మ‌ధ్య ప‌రుగులు పెడుతూ వేగంగా షూటింగ్ ఫినిష్ చేస్తున్నాడు. కాగా.. ఇవి కంప్లీట్ కాకుండానే మ‌రో సినిమాను అనౌన్స్ చేశాడు. ఈ చిత్రాన్ని ఈ రోజు అధికారికంగా ప్ర‌క‌టించాడు.

కొత్త దర్శకుడు రాజేంద్రతో ఓ సినిమా చేయబోతున్నాడు శౌర్య. 'పోలీస్ వారి హెచ్చరిక' పేరుతో ఈ మూవీ రూపొందనుంది. మంచి యాక్షన్ ఎంటర్టైనర్ గా ఈ చిత్రాన్ని తెరకెక్కించబోతున్నారు. రెగ్యులర్ షూట్ త్వరలో ప్రారంభం కానునంది. ఈస్ట్ కోస్ట్ ప్రొడక్షన్స్ బ్యానర్‌లో మహేష్ ఎస్ కొనేరు ఈ చిత్రాన్ని నిర్మించనున్నారు.

ఈ విషయాన్ని హీరో నాగశౌర్య అధికారికంగా తన ట్విట్టర్ అకౌంట్ లో ప్రకటించాడు. టైటిల్ పోస్టర్ ను షేర్ చేసిన శౌర్య.. 'కొత్త కథ మొదలు.. అద్భుతమైన ఎక్స్ పీరియన్స్ కోసం సిద్ధంగా ఉండండి' అని రాసుకొచ్చారు. కాగా.. ఈ చిత్రానికి సంబంధించిన ఇతర తారాగణం, టెక్నిీషియన్స్ వివరాలు త్వరలో ప్రకటించనున్నారు.