నాగశౌర్య సినిమా డీల్.. నమ్మదగ్గదేనా?

సినిమాను ప్రమోట్ చేయడానికి రకరకాల మార్గాలు. అందులో భాగంగా కొన్ని ‘డీల్స్’ కూడా వార్తలు అవుతున్నాయి. విడుదలకు ముందే సినిమాను అంతకు అమ్మేశాం.. ఫలానా అగ్ర నిర్మాత కొనేశాడు. డబ్బింగ్ హక్కులు ఇంత ధరకు అమ్ముడయ్యాయి.. శాటిలైట్ ఇంతకు అయ్యింది అని వార్తలు లీక్ చేయడం మామూలైపోయింది. తాజాగా నాగశౌర్య కొత్త సినిమా ‘అమ్మమ్మ గారిల్లు’కు సంబంధించి ఇలాంటి వార్తే ఒకటి బయటికి వచ్చింది. ఈ చిత్ర శాటిలైట్ హక్కులు రూ.2.75 కోట్లకు ఒక ఛానెల్ కొనుగోలు చేసిందట. ఈ విషయాన్ని స్వయంగా నిర్మాతలే ప్రకటించి ప్రమోట్ చేసుకుంటుండటం విశేషం. ఐతే శౌర్య సినిమా విడుదలకు ముందే ఇంత రేటు తెచ్చుకుందంటే ఆశ్చర్యపోవాల్సిందే. ఎంత ‘ఛలో’ విజయాత్సాహంలో ఉన్నప్పటికీ శౌర్య కొత్త సినిమాకు అంత డిమాండుదంటే నమ్మశక్యంగా అనిపించడం లేదు.

‘ఛలో’ యూత్ ఫుల్ మూవీ. థియేటర్లలో బాగా ఆడింది. కాబట్టి విడుదల తర్వాత దానికి క్రేజ్ వచ్చి శాటిలైట్ రేటు బాగానే పలికిందేమో కానీ.. దాని ప్రభావం ‘అమ్మమ్మ గారిల్లు’ మీద ఏ మేరకు ఉందనేది సందేహం. ఈ టైటిల్ చూస్తే ఇదేదో ఫ్యామిలీ డ్రామాలా అనిపిస్తోంది. యూత్ ను ఈ చిత్రం ఎంత మేరకు ఆకర్షిస్తుందన్నది డౌటు. ఇంకా సినిమా పూర్తి కాకముందే.. రిలీజ్ డేట్ అనౌన్స్ చేయకముందే... ప్రమోషన్ కూడా మొదలుపెట్టకుండానే ఒక ఛానెల్ అంత రేటు పెట్టి సినిమాను కొనేంత సీనుందా అన్నది చూడాలి. ఒక వేళ శాటిలైట్ డీల్ అయినా ఆ రేటు మాత్రం సందేహాలు రేకెత్తించేదే. మరి ఈ వార్తల్లో ఎంత వరకు నిజముందో చూడాలి. సుందర్ సూర్య అనే కొత్త దర్శకుడు రూపొందిస్తున్న ఈ చిత్రంలో నాగశౌర్య సరసన ఒకప్పటి బాలనటి.. ‘ఓయ్’ హీరోయిన్ షామిలి నటిస్తోంది.