హీరో గారి బేనర్.. ఐరా క్రియేషన్స్

నిర్మాణంలోకి అగుడు పెడుతున్న హీరోల జాబితాలో యువ కథానాయకుడు నాగశౌర్య కూడా చేరిపోయాడు. తన హోం బేనర్లో ఓ సినిమా మొదలుపెట్టేశాడు. అతడి బేనర్ పేరు.. ఐరా క్రియేషన్స్. శౌర్య తండ్రి శంకర్ ప్రసాద్ ఈ చిత్రాన్ని నిర్మిస్తున్నాడు. త్రివిక్రమ్ దగ్గర దర్శకత్వం శాఖలో పని చేసిన వేణు కుడుముల ఈ చిత్రానికి దర్శకత్వం వహించనున్నాడు. నాగశౌర్య మిత్రుడు.. హీరో నారా రోహిత్ చేతుల మీదుగా ప్రారంభోత్సవం జరుపుకుంది. శౌర్య.. రోహిత్ కాంబినేషన్లో గత ఏడాది వచ్చిన ‘జ్యో అచ్యుతానంద’ మంచి విజయం సాధించింది. రోహిత్ కొత్త సినిమా ‘కథలో రాజకుమారి’లోనూ శౌర్య కీలక పాత్ర చేస్తున్న సంగతి తెలిసిందే.

నాగశౌర్య కొత్త సినిమాలో కన్నడ హీరోయిన్ రష్మిక మండన్నా కథానాయికగా నటించనుంది. గత ఏడాది కన్నడలో సంచలన విజయం సాధించిన ‘కిరిక్ పార్టీ’ అనే సినిమాతో రష్మిక కథానాయికగా పరిచయమైంది. అందానికి అందం.. నటనకు నటన రెండూ ఉన్న ఈ అమ్మాయి తొలి సినిమాతోనే కన్నడ ప్రేక్షకుల్ని ఆకట్టుకుంది. సినీ అరంగేట్రానికి ముందు ఈ అమ్మాయి మోడల్‌ గా పని చేసింది. కొన్ని ప్రకటనల ద్వారా మన జనాలకూ ఈ అమ్మాయి పరిచయమే. ‘కిరిక్ పార్టీ’ రిలీజైన వెంటనే ఆమె చాలా ఆఫర్లు వచ్చాయి. అందులో శౌర్య సినిమా ఒకటి. ఈమెను ‘సాహో’లో ప్రభాస్ కు హీరోయిన్ గానూ కన్సిడర్ చేస్తున్నట్లుగా వార్తలొస్తున్నాయి. అల్లు అర్జున్ సినిమా కోసం కూడా ఈమెను సంప్రదిస్తున్నట్లు ఊహాగానాలు వినిపిస్తున్నాయి.

Like Us on Facebook : https://www.facebook.com/Tupakidotcom/