నాగ‌శౌర్య ప్ర‌యోగం చేస్తాడా?

నాలుగైదు సినిమాలు చేతిలో పెట్టుకొని హ‌ల్ చ‌ల్ చేస్తున్న ఓ యువ క‌థానాయ‌కుడు నాగ‌శౌర్య‌. ప్రేమ‌క‌థ‌లు ఆయ‌న‌కి బాగానే అచ్చొచ్చాయి. కానీ మ‌ధ్య‌లో యాక్ష‌న్ బాట ప‌ట్టాడు. దీంతో ప‌రాజ‌యం ఎదుర్కోవ‌ల్సి వ‌చ్చింది. అందుకే ఇప్పుడు మ‌ళ్లీ త‌న త‌ప్పు తెలుసుకొని త‌న‌కి త‌గ్గ క‌థ‌ల్నే ఎంచుకొంటున్నాడు. ఈ ద‌శ‌లో ఆయ‌న మ‌రో ప్ర‌యోగానికి కూడా సిద్ధ‌మైన‌ట్టు తెలిసింది. ఓ సినిమాలో త‌నే హీరోగా, త‌నే విల‌న్‌ గా న‌టించేందుకు గ్రీన్ సిగ్న‌ల్ ఇచ్చాడ‌ని స‌మాచారం. కిర‌ణ్ అనే ఓ కొత్త ద‌ర్శ‌కుడు చెప్పిన ఆ క‌థ నాగ‌శౌర్య‌కి బాగా న‌చ్చింద‌ట‌. అందుకే కాద‌న‌లేక రెడీ అనేశాడ‌ట‌.

అస‌లే ల‌వ‌ర్‌ బోయ్ ఇమేజ్‌ తో ఉన్న నాగ‌శౌర్య ఇక విల‌నిజం అంటే సందేహించాల్సిందే. కానీ నాగ‌శౌర్య మాత్రం ఇది కొత్త ర‌క‌మైన విల‌నిజం అని త‌న స‌న్నిహితుల‌తో చెబుతున్న‌ట్టు తెలిసింది. ఇటీవ‌ల యంగ్ హీరోలు కొత్త త‌ర‌హా క‌థ‌లపై మొగ్గు చూపుతున్నారు. ప్రేక్ష‌కులు థ్రిల్‌ కి గురవుతార‌నుకుంటే ఎలాంటి ప్ర‌యోగాల‌కైనా ఓకే అంటున్నారు. నాగ‌శౌర్య కూడా అదే శైలి ఫాలో అవుతున్నాడు. వ‌చ్చే శుక్ర‌వారం ఆయ‌న న‌టించిన క‌ళ్యాణ వైభోగ‌మే విడుద‌ల‌వుతోంది. అది హిట్ట‌యితే మాత్రం నాగ‌శౌర్య స్థాయి మ‌రో రేంజికి వెళుతుంది. దాని తర్వాత కూడా వెంట వెంట‌నే సినిమాల్ని రిలీజ్ చేసేలా ప్లాన్ చేసుకొన్నాడు శౌర్య‌.