న్యూస్ ఛానెల్ సినిమాలో నాగశౌర్య

ఊహలు గుసగుసలాడే, దిక్కులు చూడకు రామయ్యా లాంటి సినిమాలతో జోరుమీద కనిపించిన నాగశౌర్య.. ఆ తర్వాత ‘లక్ష్మీ రావే మా ఇంటికి’ - ‘జాదూగాడు’ లాంటి ఫ్లాపులతో వెనకబడిపోయాడు. ఈ మధ్య అతడికి కొత్త అవకాశాలేమీ రాలేదు. నందిని రెడ్డి దర్శకత్వంలో చేస్తున్న ‘కళ్యాణ వైభోగమే’ మినహాయిస్తే వేరే ప్రాజెక్టు చేతికి రాలేదు. దీంతో ఈ కుర్రాడి ఫ్యూచర్ మీద డౌట్లు మొదలయ్యాయి. ఐతే ఇప్పుడు అతడికో మంచి అవకాశం దక్కింది. దర్శక నిర్మాత మధుర శ్రీధర్ రెడ్డి - ప్రముఖ న్యూస్ ఛానెల్ టీవీ-9 భాగస్వామ్యంలో తీయబోతున్న కొత్త సినిమాకు నాగశౌర్యనే హీరోగా ఎంచుకున్నాడు.

ఈ సినిమాకు ‘మల్లెల తీరంలో సిరిమల్లె పువ్వు’ ఫేమ్ రామరాజు దర్శకత్వం వహించబోతున్నాడు. తొలి సినిమా కమర్షియల్ గా సక్సెస్ కాకపోయినప్పటికీ రామరాజుకు మంచి పేరు తెచ్చిపెట్టింది. కొత్త టాలెంట్ ను ప్రోత్సహించడంలో ఎప్పుడూ ముందుండే మధుర శ్రీధర్ రెడ్డి.. రామరాజు టాలెంట్ గుర్తించి అతడికి అవకాశమిచ్చాడు. తన సినిమాలకు విభిన్న మార్గాల నుంచి ఫైనాన్స్ తెచ్చుకునే శ్రీధర్.. టీవీ-9 లాంటి ప్రముఖ ఛానెల్ తో పెట్టుబడి పెట్టిస్తుండటం విశేషమే. నాగశౌర్య సరసనే హీరోయిన్ గా పరిచయమైన రాశి ఖన్నా.. ఈ సినిమాతో మరోసారి అతడికి జోడీగా నటించబోతుండటం విశేషం. ఆసక్తికర కాంబినేషన్ లో తెరకెక్కుతున్న ఈ సినిమా ఎలాంటి ఫలితాన్నిస్తుందో చూడాలి.