ఆసక్తికరంగా 'నగాదారిలో' ప్రోమో..!

రానా దగ్గుబాటి - సాయి పల్లవి ప్రధాన పాత్రల్లో నటించిన తాజా చిత్రం ''విరాట పర్వం''. 'నీది నాది ఒకటే కథ' ఫేమ్ వేణు ఊడుగుల దర్శకత్వం వహించిన ఈ సినిమా రిలీజ్ కు రెడీ అయింది. జూన్ 17న ప్రపంచ వ్యాప్తంగా థియేటర్లలో విడుదల చేయడానికి మేకర్స్ సన్నాహాలు చేస్తున్నారు. ఈ నేపథ్యంలో ప్రమోషన్స్ ముమ్మరం చేశారు.

ఇప్పటికే విడుదలైన 'విరాటపర్వం' ప్రమోషనల్ కంటెంట్ సినిమాపై ఆసక్తిని కలిగించింది. టీజర్ - 'కోలు కోలు' సాంగ్ - వాయిస్ ఆఫ్ రవన్న గ్లిమ్స్ మరియు సోల్ ఆఫ్ వెన్నెలకు ప్రేక్షకుల నుంచి మంచి స్పందన లభించింది. ఈ క్రమంలో 'నగాదారిలో' అనే మరో పాటని రిలీజ్ చేయడానికి సన్నాహాలు చేస్తున్నారు.

ఇందులో భాగంగా తాజాగా మేకర్స్ సాంగ్ ప్రోమోని వదిలారు. ''నిప్పూ ఉంది నీరు ఉంది.. నగా దారిలో చివరకు నెగ్గేదేది తగ్గేదేది నగా దారిలో..'' అంటూ సాగిన ఈ గీతం ఆకట్టుకుంటోంది. అడవిలో రానా - సాయి పల్లవిల ప్రయాణాన్ని ఈ పాటలో చూపించారు.

సురేష్ బొబ్బిలి స్వరాలు సమకూర్చిన ఈ గీతాన్ని వరంగల్ కు చెందిన జానపద గాయని వరం పాడారు. దేవెర నరేందర్ మరియు భరద్వాజ్ సాహిత్యం అందించారు. గురువారం ఉదయం 'నగాదారిలో' పూర్తి పాటను విడుదల చేయనున్నారు.

1990లలో జరిగిన యదార్థ సంఘటనల ప్రేరణతో, నక్సలిజం బ్యాక్ డ్రాప్ లో ''విరాటపర్వం'' చిత్రాన్ని రూపొందించారు. కామ్రేడ్ రవన్న అలియాస్‌ డాక్టర్‌ రవిశంకర్‌ పాత్రలో రానా.. అతని రచనలకు ప్రేమించే యువతి వెన్నెల పాత్రలో సాయి పల్లవి కనిపించనున్నారు.

ప్రియమణి - నందితా దాస్ - నవీన్ చంద్ర - జరీనా వహాబ్ - ఈశ్వరీ రావు - సాయి చంద్ బెనర్జీ - నాగినీడు - రాహుల్ రామకృష్ణ - దేవి ప్రసాద్ - ఆనంద్ రవి - ఆనంద్ చక్రపాణి తదితరులు ఈ సినిమాలో ఇతర ముఖ్య పాత్రలు పోషించారు.

దగ్గుబాటి సురేష్ బాబు సమర్పణలో శ్రీ లక్ష్మీ వెంకటేశ్వర సినిమాస్ పతాకంపై సుధాకర్ చెరుకూరి ఈ చిత్రాన్ని నిర్మించారు. డానీ సాంచెజ్ లోపెజ్ - దివాకర్ మణి సినిమాటోగ్రఫీ అందించగా.. శ్రీకర్ ప్రసాద్ ఎడిటింగ్ వర్క్ చేశారు. శ్రీ నాగేంద్ర ప్రొడక్షన్ డిజైనర్ గా వ్యవహరించారు.