మిత్రులం కాదు.. దోస్తులం అసలే కాదు

కింగ్‌ నాగార్జున, తమిళ హీరో కార్తీ .. ఈ ఇద్దరూ కలిసి నటిస్తున్న మల్టీ స్టారర్‌ ప్రస్తుతం శరవేగంగా తెరకెక్కుతోంది. ఫ్రాన్స్‌ లో నాగ్‌, కార్తీ, తమన్నా లపై కీలక సన్నివేశాల్ని తెరకెక్కిస్తున్నారని చెప్పుకున్నాం. అయితే ఈ సినిమాకి టైటిల్‌ ఇంతకాలం నిర్ణయించనేలేదు. హాలీవుడ్‌ సినిమా ఇన్‌ టచబుల్స్‌ ఆధారంగా తెరకెక్కుతున్న ఈ చిత్రానికి 'మిత్రులు', 'దోస్త్‌' అనే టైటిల్స్‌ పరిశీలినలో ఉన్నాయని ఇటీవలి కాలంలో వార్తలొచ్చాయి. అయితే ఇవేవీ నిజం కాదని కింగ్‌ స్వయంగా ఖండించారు. ఇంకా టైటిల్‌ నిర్ణయించలేదు. కొన్ని టైటిల్స్‌ పరిశీలిస్తున్నాం. త్వరలోనే వెల్లడిస్తామని చెప్పారు.

నాగార్జున పుట్టినరోజు వేడుక ఈ నెలలోనే ఉంది.. కాబట్టి అప్పుడు టైటిల్‌, ఫస్ట్‌ లుక్‌ సహా ఇతరత్రా వివరాలు వెల్లడించే అవకాశం ఉంది. క్వాడ్రిక్‌ ఫినియా అనే అరుదైన రోగి పాత్రలో నాగార్జున నటిస్తున్నారు. అతడు వీల్‌ ఛైర్‌ లోనే కూచుని సినిమా అంతా కనిపిస్తారు. ఇక తమన్నా కార్తీకి పెయిర్‌ గా నటిస్తోంది. ఈ చిత్రానికి వంశీ పైడిపల్లి దర్శకత్వం వహిస్తున్నారు. ఈ చిత్రాన్ని ప్రయోగాత్మక కమర్షియల్‌ సినిమాగా తెరకెక్కిస్తున్నానని వంశీ గతంలోనే చెప్పాడు. మరిన్ని అప్‌ డేట్స్‌ త్వరలో...