బాలీవుడ్ స్టార్ ని కాపీ కొడుతున్న నాగ్

అక్కినేని నాగార్జున హీరోగానే కాదు.. ప్రొడ్యూసర్ గా కూడా సూపర్ సక్సెస్. తను నిర్మాతగా తీసే మూవీని ఎలా పబ్లిక్ తీసుకెళ్లాలో.. సెల్లింగ్ పాయింట్స్ ఏముండాలో ఖచ్చితమైన లెక్కలు నాగ్ దగ్గరుంటాయి. అందుకోసమే కావచ్చు.. ఇప్పుడో సినిమాలో కేమియో చేస్తున్నాడు నాగార్జున. శ్రీకాంత్ కుమారుడు రోషన్ ను హీరోగా పరిచయం చేస్తూ.. నిర్మలా కాన్వెంట్ ని నిర్మిస్తున్నాడు నాగ్.

ఈ మూవీలో నాగ్ కేరక్టర్ కి సంబంధించి ఇప్పుడు షూటింగ్ ప్రారంభమైంది. ప్రమోషన్ ఈవెంట్ లాంటి ఓ పెద్ద సెట్ లో నాగ్ కనిపిస్తున్న ఫోటో ఒకటి విడుదల చేశారు. ఈ చిత్రానికి సంబంధించి.. ఇండస్ట్రీలో బజ్ క్రియేట్ చేయడానికి తనే అప్ డేట్స్ కూడా పోస్ట్ చేస్తూ ఉంటాడు నాగ్. అలాగే ఈ సినిమా రోల్ కూడా ఉంటుందని.. నిజ జీవితంలో తాను పోషించిన పాత్రనే సినిమాలోనూ చేయబోతున్నాడని తెలుస్తోంది.

నిర్మలా కాన్వెంట్ చిత్రంలో 'మీలో ఎవరు కోటీశ్వరుడు' కార్యక్రమాన్ని హోస్ట్ చేసే వ్యక్తిగా నాగ్ కనిపించనున్నారని సమాచారం. ఈ మీలో ఎవరు కోటీశ్వరుడుకు ఒరిజినల్ అయిన 'కౌన్ బనేగా కరోడ్ పతి' హోస్ట్ గా స్లమ్ డాగ్ మిలియనీర్ లో అనిల్ కపూర్ ఓ రోల్ పోషించిన సంగతి తెలిసిందే. ఇప్పుడు నాగ్ చేయనున్న కేరక్టర్ కూడా ఇలాంటిదే అని టాక్ వినిపిస్తోంది.