నాగ్ ఫ్యాన్స్.. సరిపెట్టుకోండి

గత ఏడాది ‘మనం’ సినిమాతో అభిమానుల్ని మురిపించాడు నాగార్జున. ఈ సినిమా మన్మథుడికి, అభిమానులకు మరపురాని సినిమాగా మిగిలిపోయింది. ఐతే ‘మనం’ వచ్చి ఏడాదిన్నర దాటినా నాగ్ హీరోగా నటించిన సినిమా ఏదీ విడుదల కాలేదు. ఈ ఏడాది ఆరంభంలో ఒకటికి రెండు సినిమాలు మొదలుపెట్టాడు నాగ్. ఆ రెండూ ఈ ఏడాదే రిలీజవుతాయనుకున్నారు అభిమానులు. కానీ ఒక్కటి కూడా ఈ ఏడాది విడులయ్యేలా లేదు.

‘ఊపిరి’ వచ్చే ఏడాదికని ముందే ఫిక్స్ చేసేశారు. ‘సోగ్గాడే చిన్నినాయనా’ అయినా ఈ ఏడాది వస్తుందనుకుంటే ఇప్పుడది కూడా అనుమానే అంటున్నారు. నాగార్జునకు డిసెంబర్ లో సినిమా విడుదల అన్నారు కానీ.. డిసెంబర్ లో పోటీ ఎక్కువైపోవడంతో ఇప్పుడు జనవరికి వాయిదా వేసినట్లు చెబుతున్నారు. దీంతో ఈ ఏడాది నాగ్ చేసిన రెండు క్యామియో రోల్స్ తోనే అభిమానులు సంతృప్తి చెందాల్సిన పరిస్థితి.

మంచు లక్ష్మి కథానాయికగా నటించిన ‘దొంగాట’లో ఓ పాటలో సందడి చేసిన నాగ్.. తాజాగా తన చిన్న కొడుకు అఖిల్ అరంగేట్ర సినిమాలో సైతం పాటలో ఒక నిమిషం కనిపించి మాయమయ్యాడు. మొత్తానికి రెండు సినిమాల్లో కనిపించాడన్న మాటే కానీ.. ఒక్క డైలాగ్ కూడా చెప్పలేదు నాగ్. ఐతే వచ్చే ఏడాది మాత్రం నాగ్ మూడు సినిమాలతో సందడి చేసే అవకాశముంది. సోగ్గాడే చిన్నినాయనా - ఊపిరి తొలి మూడు నెలల్లోనే వచ్చేస్తాయి. ఆ తర్వాత కొత్త సినిమాను మొదలుపెట్టి ఏడాది ఆఖర్లో రిలీజ్ చేయాలన్న ప్లాన్ తో ఉన్నాడు నాగ్.