చైతు సినిమాల గురించి నాగ్ మాట!

నాగ చైతన్య ఈ ఏడాది మొదటి ఏడు నెలలు సైలెంట్ గా ఉన్నా ఇప్పుడు మాత్రం రెండు వరస క్రేజీ ప్రాజెక్ట్స్ తో ముందుకు వస్తున్నాడు. ఇప్పటికే శైలజారెడ్డి అల్లుడుకు కావాల్సినంత బజ్ ఉండగా నిన్న రిలీజ్ చేసిన టీజర్ హైప్ ని పెంచేసింది. ఆడియోతో పాటు ఇంకా ట్రైలర్ విడుదల కావాల్సి ఉన్నందున అంచనాలు ఎగబాగకడమే కానీ తగ్గడం ఉండదు. దీంతో పాటు నిర్మాణంలో ఉన్న సవ్యసాచి ఫినిష్ కావడానికి ఇంకొంత సమయం అవసరం పడటంతో దాన్ని శైలజారెడ్డి అల్లుడు తర్వాత తీసుకురానున్నారు. చిలసౌ ప్రమోషన్ లో భాగంగా ఇచ్చిన ఇంటర్వ్యూలో నాగార్జున వీటి గురించి చెప్పిన కొన్ని ఆసక్తికరమైన సంగతులు ఇప్పుడు చర్చకు దారి తీస్తున్నాయి. సవ్యసాచి కథను తాను విన్నానని షూటింగ్ ఇంకా బాలన్స్ ఉంది కాబట్టి అది పూర్తయ్యాక చూస్తానని క్లారిటీ ఇచ్చేసాడు. అంటే నాగ్ సూచన మేరకే రీ షూట్లు జరిగాయి అన్న పుకార్లకు దీని ద్వారా చెక్ పెట్టేసారు. ఆర్టిస్టులందరూ పాల్గొనాల్సిన కొన్ని సీన్లు బాలన్స్ ఉండటం వల్లే కొంత ఆలస్యం జరిగింది అనే దాని మీద క్లారిటీ వచ్చేసింది.

సవ్యసాచి కథ విన్న నాగార్జున శైలజారెడ్డి అల్లుడు స్టోరీ మాత్రం తెలుసుకోలేదట. దర్శకుడు మారుతీ మీద అతనికి ఆడియన్స్ పల్స్ మీద అతనికున్న గ్రిప్ మీద నమ్మకంతోనే ఉన్నానని చెప్పిన నాగ్ మరో పది రోజుల్లో శైలజారెడ్డి అల్లుడు చూడబోతున్నాను అని చెప్పేసాడు. మొత్తానికి రెండు సినిమాల గురించి నమ్మకం వ్యక్తం చేసిన నాగ్ చైతుకి ఇవి పెద్ద బ్రేక్ ఇవ్వబోతున్నాయి అనే హింట్ ఇచ్చేసాడు. చందు మొండేటి దర్శకత్వంలో రూపొందిన సవ్యసాచి టీజర్ వచ్చే నెల మొదటి వారంలో విడుదల చేసే అవకాశం ఉంది. రానున్న నాలుగు నెలలలో అక్కినేని ఫాన్స్ ని వరస సినిమాలు పలకరించబోతున్నాయి. చిలసౌ-శైలజారెడ్డి అల్లుడు-సవ్యసాచి-దేవదాస్ లతో పాటు వెంకీ అట్లూరి దర్శకత్వంలో అఖిల్ చేస్తున్న తన మూడో సినిమా కూడా డిసెంబర్ లోనే వచ్చే అవకాశాలు ఉన్నాయి. సో ఫస్ట్ హాఫ్ స్లోగా ఉన్నా 2019 సెకండ్ హాఫ్ మాత్రం అక్కినేని ఫామిలీకి మహా జోరుగా ఉండబోతోంది.