నాగ్ అంత గట్టిగా ఫిక్సయ్యాడు మరి

‘మనం’ సినిమా తర్వాత చాలా గ్యాప్ తీసుకున్నాడు నాగార్జున. ఐతే కొంచెం లేటైనా ఒకేసారి రెండు సినిమాలు మొదలుపెట్టి పూర్తి చేసేయడానికి ప్లాన్ చేసుకున్నాడు. ముందుగా సొంత బేనర్లో కొత్తబ్బాయి కళ్యాణ్ దర్శకత్వంలో ‘సోగ్గాడే చిన్నినాయనా’ మొదలుపెట్టాడు. చకచకా షూటింగ్ కూడా చేశాడు. కానీ ఏమైందో ఏమో.. ఆ సినిమా సడెన్ గా వార్తల్లో లేకుండా పోయింది. కార్తితో చేయాల్సిన మల్టీ స్టారర్ లైన్ లోకి వచ్చింది. రెండు నెలల పాటు ఆ సినిమా షూటింగ్ లో పాల్గొని వచ్చాడు నాగ్. ఐతే సోగ్గాడే చిన్ని నాయనా విషయంలో గ్యాప్ తీసుకోవడం ముందు అనుకున్న ప్రణాళిక ప్రకారం జరిగిందేమీ కాదు. నిజానికి ఆ సినిమా మొత్తం పూర్తి చేశాకే కార్తితో మల్టీస్టారర్ వైపు చూడాలనుకున్నాడు నాగ్. కానీ అలా జరగలేదు.

సోగ్గాడే చిన్ని నాయనా ఔట్ పుట్ మీద అసంతృప్తి తోనే నాగ్ ఆ సినిమా నుంచి విరామం తీసుకున్నట్లు సమాచారం. స్క్రిప్టు మరింత బాగా తీర్చిదిద్ది కొన్ని సన్నివేశాలు రీషూట్ కూడా చేయాలని నాగ్ నిర్ణయించినట్లు అన్నపూర్ణ స్టూడియోస్ వర్గాల సమాచారం. ఆ ప్రకారమే కళ్యాణ్ మళ్లీ వర్క్ చేసి ఇప్పుడు నాగ్ ముందుకొచ్చాడు. ఈ మధ్యే కార్తి సినిమాకు సంబంధించి ఫారిన్ షెడ్యూల్ పూర్తి చేసుకుని వచ్చిన నాగ్.. ఇక ‘సోగ్గాడే చిన్నినాయనా’ పని పూర్తి చేసే పనిలో పడ్డాడు. ఇటీవలే ఫైనల్ షెడ్యూల్ మొదలైంది. ఈ షెడ్యూల్ సినిమా పూర్తయ్యేవరకు నాన్ స్టాప్ గా సాగుతుందని ట్విట్టర్ లో ప్రకటించాడు నాగ్. అంటే ఇప్పుడు నాగ్ స్క్రిప్టు విషయంలో పూర్తి సంతృప్తితో ఉన్నట్లే అన్నమాట. ఈ ఏడాది డిసెంబర్ లో ఈ సినిమాను ప్రేక్షకుల ముందుకు తేవాలన్నది ప్లాన్.